МУС Украіны: «Украінская выведка на сувязі з захопленымі ў палон байцамі «Азова»


Міністр унутраных справаў Украіны паведаміў, што ва Украіне трымаюць кантакт з палоннымі байцамі «Азова». Дзяніс Манастырскі ў тэлеграм-канале МУС заявіў, што ўкраінскія спецслужбы маюць сувязь з вайскоўцамі палка, якія трапілі ў палон у паўднёвым партовым горадзе Марыупаль.

Эвакуацыя ўкраінскіх байцоў з «Азоўсталі».
Фота: novoeizdanie.com

Па-ранейшаму застаецца фактычна невядомым лёс сотняў байцоў «Азова», якія трапілі ў расейскі палон, пасля таго як яны доўгі час пратрымаліся на акружаным сталеліцейным заводзе «Азоўсталь» у Марыупалі. Вядома, што іх вывезлі на падкантрольную Расеі тэрыторыю Украіны. Украіна заклікала да абмену палоннымі, але некаторыя ў Расеі – у тым ліку намеснік міністра замежных справаў – заявілі, што іх трэба аддаць пад суд.

Кіраўнік МУС Украіны паведаміў, што ўкраінская выведка трымае сувязь з палоннымі жаўнерамі і робіць намаганні для іхнага абмену або вызвалення.

«Менавіта праз іх (выведку. – Заўв. belsat.eu) мы даведаемся больш пра ўмовы іхнага жыцця, харчаванне і магчымасці вызвалення. Мы ўсе ведаем, што яны рана ці позна апынуцца тут, у Кіеве, і мы зробім усё, каб гэта адбылося», – заявіў Дзяніс Манастырскі.

Аналітыка
«Здача ў палон» ці абмен? Маці і жонкі абаронцаў «Азоўсталі» застаюцца ў няведанні і баяцца расстрэлаў
2022.05.21 11:57

Нагадаем, што ўвечары 16 траўня пасля амаль трох месяцаў жорсткіх баёў украінскі бок заявіў пра пачатак аперацыі дзеля выратавання абаронцаў «Азоўсталі». Станам на 20 траўня прыкладна 1700 жаўнераў трапілі ў расейскі палон.

Раман Лугоўскі, belsat.eu

Стужка навінаў