У Берасці суд прысудзіў 2,5 гады «хіміі» працаўніку Берасцейскага тэатру лялек. Андрэя Шчыгеля прызналі вінаватым паводле ч. 1 і ч. 2 арт. 368 КК («Абраза Лукашэнкі»). Суд па гэтай справе быў 31 студзеня, але праваабаронцы даведаліся пра справу толькі цяпер.
Андрэя Шчыгеля, жыхара Берасця суддзя суда Маскоўскага раёну Берасця Таццяна Лаўранюк асудзіла на два з паловай гады «хіміі». Падставай для прысуду стала тое, што 50-гадовы жыхар Берасця размясціў у «Tik-Tok» зварот, у якім вінаваціў Лукашэнку ў здзяйсненні асабліва цяжкага злачынства, прадугледжанага арт. 139 КК РБ «Забойства». Акрамя таго ў тым жа акаўнце ў «Tik-Tok» ён выклаў яшчэ адзін відэазварот, у якім, згодна з версіяй лінгвістычнай экспертызы, утрымліваліся абразы і ненарматыўная лексіка, накіраваныя на адрас Лукашэнкі.
Сілавікі ўгледзелі ў гэтым злачынства паводле ч. 1 і ч. 2 арт. 368 КК («Абраза Лукашэнкі»).
Андрэй Шчыгель працуе манціроўшчыкам сцэны ў Берасцейскім тэатры лялек. На працы яго характарызуюць толькі са станоўчага боку. Маці мужчыны мае інваліднасць 2-й групы.
СВ belsat.eu