Чарговая справа супраць Латушкі, новы каронавірусны антырэкорд. Галоўнае за 4 лютага
543 дні цягнецца востры палітычны крызіс у Беларусі, які абумоўлены супрацьстаяннем грамадства і ўладаў краіны. «Белсат» падводзіць вынікі дня.
Павел Латушка падазраваны ў хабарніцтве
Працаўнікі Камітэту дзяржкантролю праверылі выдаткаванне бюджэтных сродкаў на вытворчасць фільмаў і выявілі парушэнні. Падазраваным аказаўся Павел Латушка, які ў 2012 годзе працаваў на пасадзе міністра культуры, паведамляе прэсавая служба ДФР.
Арыштаванага стрыечнага брата Латушкі збівалі міліцыянты
Паводле звестак родных, палітвязня Анатоля Латушку збівалі ў Цэнтральным РУУС. Сілавікі патрабавалі ад яго пароль да тэлефону, піша праваабарончы цэнтр «Вясна».
У Пекіне распачалі Алімпіяду
4 лютага на Пекінскім нацыянальным стадыёне, які называюць «Птушынае гняздо», адбылася цырымонія адкрыцця зімовых Алімпійскіх гульняў 2022 года. Падчас цырымоніі краіна, у якой адбываюцца спартовыя спаборніцтвы, арганізуе музыку, песні, танцы і феерверкі, якія запрашаюць гледачоў пазнаёміцца з культураю краіны. У сёлетняй цырымоніі ўзялі ўдзел 95 краінаў свету.
Беларуская каманда на адкрыцці Алімпіяды ў Пекіне выйшла 22-й на вядомы стадыён. Сцяганосцамі беларускай алімпійскай зборнай выступілі канькабежцы Ганна Ніфонтава і Ігнат Галавацюк.
Вядомага прадпрымальніка Аляксандра Васілевіча вызвалілі ў залі суда
У судзе Савецкага раёну Менску 4 лютага агучылі вырак бізнесоўцу Аляксандру Васілевічу, сузаснавальніку парталаў «Kyky» і «The Village», паведамляе радыё «Свабода».
У палітзняволенай Вольгі Лойкі памёр бацька
Галоўная рэдактарка палітычна-эканамічнага блоку ў TUT.by Вольга Лойка даслала на волю ліст, датаваны 1 лютага. Яна напісала, што пакуль яна ў СІЗА № 1, памёр ейны бацька, а сястра прайшла цяжкае лячэнне.
Яшчэ адзін фэйкавы ліст з загадам арганізаваць «дыялогавую пляцоўку»
Гісторыя з фэйкавым лістом з загадам арганізаваць «дыялогавую пляцоўку» атрымала працяг. Гэтым разам ліст з патрабаваннем прыйшоў у гімназію Рэчыцы. Адметна, што мерапрыемства там таксама зладзілі, піша праваабарончы цэнтр «Вясна».
Каронавірус не адступае
Паводле звестак Міністэрства аховы здароўя, на дзень 4 лютага ў Беларусі выяўвілі 7350 новых выпадкаў заражэння каронавіруснай інфекцыяй. Гэта самая вялікая лічба за ўвесь час пандэміі.
СВ belsat.eu
