Рашэннем Міністэрства ўнутраных спраў «экстрэмісцкім фарміраваннем» прызнаны фонд салідарнасці «BYSOL», у тым ліку структурныя падраздзяленні «Voices from Belarus» і «Digital Solidarity».
У паведамленні ўказана, што «дзеянні стваральнікаў, кіраўнікоў названага экстрэмісцкага фарміравання, а таксама яго ўдзельнікаў утвараюць склад злачынства, прадугледжанага арт.361-1 Крымінальнага кодэкса Беларусі («Стварэнне экстрэмісцкага фарміравання»).
Фонд салідарнасці «BYSOL» утварыўся пасля хвалі беззаконня і гвалту ў жніўні 2020 года. Фонд аказвае дапамогу людзям, якія страцілі працу з палітычных прычынаў, і тым, хто быў вымушаны пакінуць краіну. «BYSOL» падтрымлівае ініцыятывы, якія дапамагаюць рэпрэсаваным і пацярпелым беларусам.
Ініцыятыва «Voice from Belarus» сілай валанцёраў стварае, перакладае і распаўсюджвае апошнія навіны пра бягучую сітуацыю ў Беларусі. Для большага інфармавання пераклады паведамленняў беларускіх СМІ ажыццяўляюцца на шэсць моў: англійскую, нямецкую, французскую, польскую, іспанскую і партугальскую.
Дадатак «Digital Solidarity» – агульная платформа, на якой сабраны правераныя фонды і зборы ініцыятыў, якія «умацоўваюць партызанскі рух, дапамагаюць пацярпелым, узмацняюць унутраны ціск і набліжаюць перамены». Праз яго можна дапамагаць не толькі буйным вядомым фондам, але і падтрымліваць невялікія ініцыятывы, сем’і і пэўных людзей.
АД belsat.eu