Пасля расейскага ўварвання ва Украіну Еўразвяз рэзка скараціў спажыванне расейскага газу, бо зразумеў, што РФ не ёсць надзейным дастаўцам. Пра гэта ў інтэрвʼю «РБК-Україна» 3 кастрычніка заявіў кіраўнік прадстаўніцтва ЕЗ ва Украіне Маці Маасікас.
«Калі пачалося ўварванне, 40 % прыроднага газу ў ЕЗ паступала з Расеі. Цяпер ён складае 9 %, фармальнай санкцыі на гэта няма. ЕЗ зразумеў і ў выніку пагадзіўся, што РФ не ёсць надзейным дастаўцам», – сказаў дыпламат.
Цяпер ЕЗ і яго краіны-чальцы прыкладаюць узгодненыя намаганні, каб цалкам пазбавіцца ад расейскага імпарту.
Як паведамлялася, 27 верасня стала вядома пра тры выцекі на газаправодах «Паўночная плынь» і «Паўночная плынь – 2»: дзве на першым і адну на другім. Інцыдэнт адбыўся ля берагоў Даніі ды супаў з прэзентацыяй еўрапейскага праекту «Baltic Pipe», які дазваляе пастаўляць да 10 мільярдаў кубаметраў газу за год з Нарвегіі ў Польшчу праз тэрыторыю Даніі.
Антон Тачняк belsat.eu
