3 кастрычніка беларусы Францыі зладзілі пікет ля штаб кватэры Інтэрполу, каб заклікаць яго да спынення супрацы з беларускім рэжымам.
«Загадзя мы даслалі адкрыты ліст у Інтэрпол з тлумачэннем сітуацыі з Макарыем Малахоўскім у Польшчы, і пазначылі, што на наш погляд беларускія спецслужбы выкарыстоўваюць Інтэрпол для пераследу апазіцыянераў нават за мяжой Беларусі. Нам з Інтэрполу даслалі адказ, што яны ўжо ўжываюць пратакол «Red Notice» у дачыненні да Беларусі і што кожны запыт ад іх праходзіць спецыяльную праверку. Але выпадак з Макарыем сведчыць аб іншым, таму мы ўсё роўна выйшлі да будынку ў гэтую нядзелю каб заклікаць Інтэрпол да супрацоўніцтва з дэмакратычнымі сіламі і «ByPol» каб перадухіліць такія сітуацыі ў будучыні», – заявілі беларусы Францыі.
У Польшчы збіралі подпісы
А ў Варшаве прайшла акцыя салідарнасці з палітвязнямі з мэтай звярнуць увагу міжнароднай грамадскасці на адсутнасць медычнай дапамогі для палітвязняў, а таксама падтрымаць рабочы рух у Беларусі.
На акцыі распавялі пра стан здароўя некаторых палітвязняў, пра тыя катаванні, якія з імі адбываюцца.
На мерапрыемстве таксама збіралі подпісы аб прызнанні Аляксандра Лукашэнкі нелегітымным ды пад зваротам да прэзідэнта Польшчы аб стварэнні плошчы Вольнай Беларусі.
МГ belsat.eu
