У Гомельскім абласным судзе 3 жніўня а 14:10 павінны агучыць прысуд журналістцы TVP Ірыне Слаўнікавай, якую трымаюць за кратамі з 30 кастрычніка мінулага года. Дзяржаўны абвінаваўца патрабуе для яе 4 гады калоніі.
Журналістку абвінавачваюць паводле двух артыкулаў КК: арт. 342 («Арганізацыя і рыхтаванне дзеянняў, што груба парушаюць грамадскі парадак, або актыўны ўдзел у іх») і арт. 361.1 («Стварэнне экстрэмісцкага фармавання, або ўдзел у ім»).
Суд над Ірынай Слаўнікавай праходзіць у закрытым рэжыме. Узначальвае працэс Мікалай Доля, які вынес прысуд у «справе Ціханоўскага».
У сувязі з чарговым судовым паседжаннем у справе Ірыны Слаўнікавай журналісты правялі акцыю каля сядзібы прадстаўніцтва Еўракамісіі ў Варшаве, падчас якой накіравалі петыцыю з просьбай увесці санкцыі супраць тых, хто мае дачыненне да пераследу журналістаў у Беларусі.
Якуб Хруст belsat.eu
