Кіраўнік ураду Польшчы Матэвуш Маравецкі адрэагаваў на прысуд журналістцы TVP Ірыне Слаўнікавай да 5 гадоў калоніі. Ён назваў прысуд «непрымальным».
На сваёй старонцы ў «Фэйсбуку» Матэвуш Маравецкі спаслаўся на прысуд, вынесены сёння ў Гомлі журналістцы Ірыне Слаўнікавай.
«Свабода друку, слова і свабоднае права на выказванне свайго меркавання з’яўляюцца асновамі дэмакратыі, – напісаў ён.
Паводле кіраўніка польскага ўраду, асуджэнне рэжымам Аляксандра Лукашэнкі журналісткі Ірыны Слаўнікавай на 5 гадоў калоніі «зʼяўляецца абсалютным скандалам, парушэннем усіх цывілізацыйных нормаў, правоў чалавека і журналісцкіх стандартаў».
«Гэты непрымальны прысуд сустрэне неадкладную, рашучую рэакцыю Польшчы на міжнародным узроўні, – запэўніў ён, дадаўшы, што загадаў Міністэрству замежных спраў «зрабіць рашучыя і прынцыповыя крокі».
Раённы суд Гомля сёння вынес рашэнне па справе Ірыны Слаўнікавай. Яе прызналі вінаватай у «стварэнні экстрэмісцкага фармавання» і асудзілі на 5 гадоў пазбаўлення волі ў калоніі. Прысуд быў нават больш жорсткі, чым хацела абвінавачанне, якое патрабавала 4 гады калоніі.
Марыя Мурашка belsat.eu