360 дзён працягваецца палітычны крызіс у Беларусі і супрацьстаянне грамадзянаў краіны з уладамі. «Белсат» падводзіць вынікі гэтага дня.
Палітзняволенай Марыі Калеснікавай, якая цяпер у СІЗА ў Менску, прапанавалі выступіць на нацыянальным дзяржтэлеканале з інтэрв’ю і напісаць прашэнне аб памілаванні ў абмен на вызваленне. Пра гэта паведамляе расейскі тэлеканал «Дождь».
Марыя Калеснікава распавяла, што ў СІЗА ёй некалькі разоў прапаноўвалі супрацу са следствам і напісаць прашэнне аб памілаванні ў абмен на вызваленне.
«Я сама прапаную ініцыяваць дыялог, перамовы, каб спыніць супрацьстаянне ў грамадстве. Мяне «пачулі» і прапанавалі здымацца ў кіно а-ля Раман Пратасевіч», – распавяла палітзняволеная.
Марыя Калеснікава кажа, што згодная выступіць на дзяржаўным тэлеканале, каб распавесці пра выкраданне і бязмежжа ў турме. Яна адмовілася напісаць прашэнне аб памілаванні, бо не лічыць сябе вінаватай.
«Гэта банда подлых, баязлівых напарстнікаў, і дзіўна было б ім давяраць. Яны ж заўсёды хлусяць. Не вер, не бойся, не прасі і смейся – гэта мой прынцып камунікавання з імі», – патлумачыла Калеснікава.
Літоўскія памежнікі за амаль содні не прапусцілі ў Літву і вярнулі ў Беларусь каля 180 мігрантаў, якія спрабавалі перакрочыць мяжу. Прадстаўнікі беларускага памежнага камітэту пацвердзілі, што зафіксавалі перасячэнне мяжы мігрантамі з тэрыторыі Літвы.
Паводле афіцыйнага прадстаўніка Дзяржаўнага памежнага камітэту Антона Бычкоўскага, беларускія памежнікі затрымалі каля 40 асобаў.
Беларускі бок заяўляе пра парушэнні літоўцамі правоў чалавека.
«Мы лічым недапушчальным выкарыстоўваць такія метады і спосабы ў дачыненні да ўразлівых асобаў, а тым больш жанчын і дзяцей. У гэты час такія дзеянні груба парушаюць правы чалавека і падлягаюць расследаванню кампетэнтнымі органамі, у тым ліку міжнароднымі», – дадаў Бычкоўскі.
Афіцыйны прадстаўнік Міжнароднага алімпійскага камітэту Марк Эдамз заявіў 3 жніўня, што МАК расследуе абвінавачанні, выстаўленыя Беларусі аб спробе гвалтоўна вывезці з Алімпійскіх гульняў у Японіі беларускую атлетку Крысціну Ціманоўскую.
«Нам неабходна ўсталяваць поўныя факты, гэта можа заняць час, – перадае BBC словы Эдамза. – А пакуль наш першы клопат – атлетка».
Расейскі «Інтэрфакс» дадае, што Эдамз казаў: невядома, колькі часу зойме расследаванне, бо «нам трэба дакапацца да сутнасці».
МАК чакае тлумачэнняў ад Нацыянальнага алімпійскага камітэту Беларусі ўжо сёння.
Лёгкаатлеты Яна Максімава і ейны муж Андрэй Краўчанка пастанавілі не вяртацца ў Беларусь з Нямеччыны і засталіся ў гэтай краіне.
«На вялікі жаль, цяпер там (у Беларусі. – Belsat.eu) можна страціць не толькі свабоду, але і пазбавіцца жыцця», – напісала Яна Максімава ў сваім Instagram.
Акрамя гэтага, Канстанцін Якаўлеў, трэнер гандбольнага клубу «Віцязь» і актывіст незалежнага аб’яднання спартоўцаў ,зʼехаў ва Украіну. Раней спартоўца каралі адміністратыўным арыштам.
Старшыня Беларускай тэніснай федэрацыі Сяргей Цяцерын напісаў заяву аб адстаўцы, паведамляе сайт грамадскага аб’яднання.
Паводле афіцыйнай інфармацыі, Сяргей Цяцерын падаў у адстаўку. Новага кіраўніка федэрацыі абяруць у верасні.
Прычынаю для звальнення могуць быць дасягненні беларускіх спартоўцаў на алімпіядзе ў Токіа. Беларускія тэнісісты паказалі сціплыя вынікі.
Сяргей Цяцерын – адзін з набліжаных да Лукашэнкі асобаў. Раней былы кіраўнік федэрацыі тэнісу з’яўляўся каля Лукашэнкі падчас збору кавуноў і касіў з ім траву.
Раніцай 2 жніўня Віталь Шышоў выйшаў на прабежку і знік. А зранку 3 жніўня яго знайшлі павешаным на ўскрайку Кіева.
Цела зніклага актывіста знайшлі павешаным на дрэве ў лесапаласе на мяжы Кіева і вобласці, у ваколіцах пасёлку Чайкі. Недалёка ад яго быў ягоны мабільны тэлефон.
Паліцыя распачала крымінальную справу паводле артыкулу «Наўмыснае забойства». Аднак забойства, замаскаванае пад суіцыд, гэта толькі адна з версіяў паліцыі.
У чаце «Беларускага дому» карыстальнікі пішуць, што не вераць у самагубства. Сама арганізацыя сцвярджае: «няма сумневаў, што гэта спланаваная чэкістамі аперацыя ліквідацыі».
Знаёмыя Віталя Шышова распавядалі «Белсату», што раней за ім сачылі невядомыя падчас прабежак. Таксама да яго і да ягонай дзяўчыны падыходзілі падазроныя людзі, спрабавалі размаўляць.
Днём 3 жніўня кіеўскія паліцыянты далі брыфінг аб тым, што вядома ў справе.
Паводле паліцыі, 2 жніўня а 15:18 паступіла два паведамленні, што Віталь сышоў раніцай на прабежку і не вярнуўся дадому. Адразу на месца яго пражывання выехала міліцыя. А на звыклае месца яго прабежак – супрацоўнікі МУС і валанцёры.
Раніцай 3 жніўня пошукі працягнуліся – і было знойдзенае ягонае цела. На месцы трагедыі былі два пянькі і пятля.
Пакуль разглядаюцца дзве версіі: самагубства і наўмыснае забойства, прыхаванае пад самагубства. Вывучаюцца камеры, вядзецца апытанне сведкаў і вывучаецца лад жыцця загінулага.
На целе Віталя ёсць пашкоджанні, але яны адпавядаюць паводле характарыстык «аднаразоваму падзенню». Будуць праводзіцца экспертызы.
Шышоў – заснавальнік грамадскай арганізацыі пад назвай «Беларускі дом ва Украіне». Аднак журналісты радыё «Свабода» падкрэсліваюць, што першапачаткова гэтая структура была звязаная з Сяргеем Кароткім – беларусам, які ваяваў на Данбасе ў складзе дабравольніцкага батальёнау«Азоў», а затым атрымаў украінскае грамадзянства.
СК belsat.eu