Пункт пропуску транспарту і грамадзянаў Даут-ата – Тажэн на мяжы Узбекістану з Казахстанам часова закрыты. Гэта пацвердзілі і ў Казахстане, паведамляе радыё «Свабода». На абмежаванні пайшлі праз пратэсты ў Каракалпакстане, які мяжуе з трыма казахскімі рэгіёнамі.
Магчыма, спыняцца і чыгуначныя зносіны Каракалпакстану з суседнім Казахстанам.
Прэзідэнт Узбекістану Шаўкат Мірзіёеў прыбыў у суботу ў сталіцу аўтаномнай рэспублікі Каракалпакстан Нукус і паабяцаў захаваць у Канстытуцыі краіны пункт аб суверэнітэце аўтаноміі.
Разам з гэтым, з 3 ліпеня ён увёў у мяцежным рэгіёне рэжым надзвычайнага становішча. Ён абвешчаны да 2 жніўня, пра гэта распавёў прэс-сакратар Узбекістану Шэрзод Асадаў.
Маштабныя пратэсты ў Каракалпакстане пачаліся 1 ліпеня пасля публікацыі праекту паправак да Канстытуцыі. Новая рэдакцыя была вынесеная на грамадскае абмеркаванне 26 чэрвеня. У ёй выключаецца суверэнітэт Рэспублікі Каракалпакстан і права яе насельніцтва на аддзяленне на аснове ўсеагульнага рэферэндуму. Пасля пратэстаў папраўкі пра адмену аўтаноміі пастанавілі скасаваць.
Марыя Мурашка, belsat.eu