Афіцыйны Дзень незалежнасці 3 ліпеня стаў для беларусаў 329 днём іх няспыннага змагання супраць фальсіфікацыі вынікаў прэзідэнцкіх выбараў і гвалту ўладаў.
Галоўнай падзеяй дня стала святкаванне Дня незалежнасці, які з 27 на 3 ліпеня на самым пачатку сваёй прэзідэнцкай кар’еры перанёс Аляксандр Лукашэнка. Сам ён сёння наведаў Курган Славы, а пасля – оперны тэатр, дзе сярод іншага заклікаў інтэлігенцыю быць асцярожней у выказванні сваёй грамадска-палітычнай пазіцыі.
Само ж свята праходзіла ў нязвыклым фармаце – без параду. Сёлета яго не было ані на 9 траўня, ані на 3 ліпеня. Такое здарылася ўпершыню ў больш як за 20 гадоў.
Святочныя мерапрыемствы праводзіліся па ўсёй краіне, але ў асноўным яны былі бязлюднымі. Паўпустыя пляцоўкі і адзінокія выступоўцы сталі адметнасцю сёлетняга святкавання.
А вось дзе людзей сёння было шмат, дык на каталіцкіх святкаваннях у Будславе. Там, паводле ацэнак, за два дні было каля 30 тыс. чалавек. Каталіцкія біскупы сярод іншага ў сваіх казаннях казалі пра вобраз «новай шчаслівай Беларусі» і пра тое, што сапраўдная ўлада мусіць быць без гвалту.
А вось гімну «Магутны Божа» не было – за яго выкананне Лукашэнка напярэдадні прыгразіў непрыемнасцямі. Рэлігійны спеў каталікі хацелі выканаць падчас запланаванай уладамі ўсебеларускай малітвы, якая прайшла збольшага сёлета толькі ў праваслаўных цэрквах. Дый значную частку сярод яе ўдзельнікаў складалі чыноўнікі.
Напярэдадні Лукашэнка загадаў закрыць мяжу з Украінай – маўляў, адтуль паступае вельмі шмат зброі. Але сёння ўкраінскія памежнікі заявілі, што ніякага ўзмацнення не заўважылі, а зброі сёлета што ўкраінцы, што беларусы затрымалі ў сем разоў меней, чым летась.
Між тым за магчымае перакрыццё мяжы з Украінай чарговымі санкцыямі Менску прыгразілі ЗША.
А вось сітуацыя на заходняй мяжы працягвае пагаршацца. Паток нелегалаў у Літву працягвае біць усе магчымыя рэкорды, сёння нават памежнікі вымушаныя былі ўжыць зброю. Узмацняе ахову сваёй мяжы з Беларуссю і Латвія.
Ім абяцае дапамогу Еўразвяз, а літоўскія ўлады збіраюцца падаваць на Лукашэнку ў суд за арганізацыю паставак мігрантаў. Як кажа Павел Латушка, за патокам нелегалаў стаіць асабіста Віктар Лукашэнка.
Беларусы між тым працягваюць свой пратэст. Як напрыклад, у выглядзе з салідарнасці з футбалістам «Крумкачоў», журналістам і палітвязнем Аляксандрам Івуліным.
Гэтак і ў выглядзе розных акцыяў.
Святлана Ціханоўская сёння завяршыла афіцыйны візіт у Ісландыю, дзе сярод іншага абмеркавала з уладамі краіны магчымасці далейшага ціску на Лукашэнку і ягонае атачэнне, а таксама дапамогу беларускім медыям і ахвярам рэпрэсіяў.
МГ belsat.eu