Стала вядома, калі Украіна разлічвае атрымаць статус кандыдата на сяброўства ў ЕЗ
Віцэ-прэм’ерка ў пытаннях еўрапейскай і еўраатлантычнай інтэграцыі Вольга Стэфанішына заявіла, што Украіна разлічвае атрымаць статус кандыдата на сяброўства ў ЕЗ ужо ў канцы чэрвеня. Заява прагучала на Міжнародным форуме ў пытаннях бяспекі «Globsec» у Браціславе, паведамляе карэспандэнт «Белсату».
Паводле Стэфанішынай, украінскі бок разумее складанасці працэдуры прыняцця калектыўных пастановаў у межах Еўрапейскага Звязу. У выпадку з заяўкаю Кіева на сяброўства ў ЕЗ неабходнае падтрыманне лідараў усіх 27 краінаў, абʼяднаных цяпер у Еўрапейскім Звязе.
Разам з тым, украінскія ўлады разлічваюць атрымаць юрыдычны адказ з боку Бруселю цягам гэтага месяца.
«Вы, беларусы, цудоўна ведаеце лекцыі гісторыі. Мы не верым у абяцанні. У сакавіку Украіне далі абяцанне, што Украіна стане чальцом Еўрапейскага Звязу. Мы патрабуем канкрэтных рашэнняў, каб у канцы чэрвеня Украіна сталася кандыдатам на сяброўства ў ЕЗ. Гэта юрыдычнае рашэнне, абавязковае і для нас, і для Еўропы», – заявіла Стэфанішына ў размове з карэспандэнтам «Белсату».
Паводле Стэфанішынай, гэтая пастанова важнаЯ ў тым ліку і для Расейскай Федэрацыі, каб у Крамлі разумелі, што Украіна ёсць часткаю дэмакратычнага свету.
Міжнародны форум у пытаннях бяспекі «Globsec» праходзіць у сталіцы Славаччыны з 2 да 4 чэрвеня. Сярод удзельнікаў форуму – і беларуская дэлегацыя на чале са Святланаю Ціханоўскаю.
Раман Лугоўскі belsat.eu
