«Рэпарцёры без межаў»: Беларусь – самая небяспечная ў Еўропе краіна для журналістаў да ўварвання Расеі ва Украіну
Міжнародная арганізацыя «Рэпарцёры без межаў» апублікавала «Індэкс свабоды прэсы». Беларусь у ім гэтым разам трапіла на 153-е месца са 180.
У 2021 годзе Беларусь займала 158-е месца. Сёлета нашая краіна на два пункты вышэй за Расею, што месціцца ў спісе на 155-м месцы.
«Самая небяспечная краіна Еўропы для журналістаў да ўварвання Расеі ва Украіну, Беларусь, працягвае пераслед незалежных СМІ і рэпарцёраў гэтых СМІ», – так характарызуюць нашую краіну «Рэпарцёры без межаў».
Аўтары індэксу падкрэсліваюць, што СМІ ў Беларусі ніколі так не цярпелі ад рэпрэсіяў, як пасля жніўня 2020 года, калі медыі пачалі закрываць, прызнаваць экстрэмісцкімі, а журналістаў арыштоўвалі і прысуджалі ім вялікія турэмныя тэрміны.
Украіна ў спісе займае 106-е месца. Польшча – 66-е, Латвія – 22-е. Літва займае 9-е месца і такім чынам уваходзіць у дзясятку самых свабодных для СМІ краінаў.
На першым месцы – Нарвегія. За ёй ідуць Данія, Швецыя, Эстонія, Фінляндыя, Ірландыя, Партугалія, Коста-Рыка, Літва і Ліхтэнштэйн.
Унізе рэйтынгу – самыя небяспечныя для журналістаў краіны: Сірыя, Ірак, Куба, В’етнам, Кітай, М’янма, Туркменістан, Іран, Эрытрэя і Паўночная Карэя.
ГГ, belsat.eu
