Кыргызстан і Таджыкістан завяршылі працэс адводу ад мяжы сваіх вайсковых падраздзяленняў. Пра гэта паведаміла Памежная служба Дзяржаўнага камітэту нацыянальнай бяспекі Кыргызстану, перадае ТАСС.
«Бакі завяршылі адвод дадатковых сілаў і сродкаў ад лініі дзяржаўнай мяжы ўглыб сваіх тэрыторыяў», – гаворыцца ў паведамленні.
Паводле памежнага ведамства, сітуацыя на мяжы і ў прылеглых да яе раёнах цяпер стабільная, за мінулую ноч «інцыдэнты і перастрэлкі не зафіксаваныя».
Адзін з найбуйнейшых узброеных канфліктаў паміж грамадзянамі, а пазней і войскамі Таджыкістану і Кыргызстану адбыўся ўначы на 29 красавіка. Гэта здарылася на спрэчнай тэрыторыі на поўдні Кыргызстану, у Баткенскай вобласці.
У выніку канфлікту загінулі 34 кіргізы, у тым ліку 12-гадовая дзяўчынка. Больш за 180 чалавек пацярпелі. На тэрыторыі Кыргызстану былі спаленыя жылыя дамы, 27 бензастанцыяў, разрабаваныя крамы. Таджыкістан паведамляе пра 10 забітых, але інфармацыі пра загінулых не раскрывае.
З прычыны невыразнага падзелу межаў на тэрыторыі паміж Кыргызстанам і Таджыкістанам перыядычна ўспыхваюць канфлікты. Гэтым разам падставаю стаў водазабор «Галаўны», у сяле Кок-Таш у Баткенскай вобласці. Ён забяспечвае вадой грамадзянаў абедзвюх краін.
Версіі бакоў аб пачатку канфлікту адрозніваюцца. Дакладна вядома толькі тое, што прычынаю стала ўсталяванне камераў на водазаборы. У Таджыкістане лічаць, што жыхары Кыргызстану несправядліва размяркоўваюць ваду, таму пастанавілі ўсталяваць камеры для назірання.
У сваю чаргу ўлады і жыхары кіргізскіх паселішчаў запатрабавалі прыбраць камеры, пастаўленыя без двухбаковага згоды. Жыхары не змаглі пераадолець канфлікту мірна, бакі пачалі закідваць адзін аднаго камянямі. Гэта вылілася ў пагромы і перастрэлку паміж вайскоўцамі і цывільнымі дзвюх краінаў.
АД, belsat.eu