268-ы дзень пратэстаў. Латушка анансаваў новую акцыю пратэсту, Мінюст не зарэгістраваў прарасейскую партыю

Палітычны крызіс у Беларусі працягваецца з 9 жніўня мінулага году. Беларусы абураныя фальсіфікацыямі і гвалтам, які чыняць сілавікі ў дачыненні да мірных дэманстрантаў. Рэжым у сваю чаргу пакуль не дэманструе жадання распачаць дыялог.

Замежныя амбасадары падтрымалі незалежныя медыі ў Беларусі

Амбасадар Вялікай Брытаніі ў Беларусі Жаклін Перкінс і пасол Канады ў Польшчы і Беларусі па сумяшчальніцтве Леслі Люіс Скэнлан у супольным відэазвароце, які змясцілі ў Facebook, заклікалі ўлады Беларусі стварыць бяспечныя ўмовы працы для незалежных медыяў.

3 траўня ў свеце адзначаецца адзначаецца Сусветны дзень свабоды прэсы. З гэтай нагоды амбасадар Вялікай Брытаніі ў Беларусі Жаклін Перкінс і пасол Канады ў Польшчы і Беларусі па сумяшчальніцтве Леслі Люіс Скэнлан запісалі супольны відэазварот да беларускіх уладаў, у якім нагадалі, што свабодная прэса з’яўляецца падмуркам дэмакратычнага грамадства, а свабода выказвання меркавання – універсальнае права чалавека. Пры гэтым амбасадарка Вялікай Брытаніі канстатуе, што ўлады Беларусі распачалі падаўленне незалежных медыяў. У выніку ў сусветным рэйтынгу свабоды слова нашая краіна стала самай небяспечнай краінай Еўропы для працаўнікоў медыяў.

Дыпламаты нагадалі беларускім уладам, што яны павінныя стварыць бяспечныя ўмовы працы для незалежных СМІ.

Амбасадары Вялікай Брытаніі і Канады падтрымалі незалежныя медыі ў Беларусі

 

Прэзідэнт Польшчы напісаў ліст зняволеным у Беларусі палякам

З нагоды Дня польскай дыяспары і палякаў за мяжой прэзідэнт Польшчы Анджэй Дуда 2 траўня напісаў ліст да арыштаваных сябраў Саюза палякаў у Беларусі: Анджэлікі Борыс, Ірэны Бярнацкай, Марыі Цішкоўскай і Анджэя Пачобута, а таксама да Ганны Панішавай – прэзідэнткі Форуму польскіх мясцовых ініцыятываў.

Прэзідэнт Польшчы Анджэй Дуда. Крыніца: Eliza Radzikowska-Biaołobrzewska / KPRP / prezydent.pl

«У гэты асаблівы дзень – Дзень польскай дыяспары і палякаў за мяжой, які адзначаецца сёння, я хацеў бы выказаць салідарнасць з вамі і з усімі, хто зазнае пераслед у Беларусі з нацыянальных і палітычных матываў», – напісаў прэзідэнт Польшчы.

230 год першай у Еўропе Канстытуцыі

Прарасейскую партыю не зарэгістравалі

Міністэрства юстыцыі разгледзела дакументы на рэгістрацыю палітычнай партыі «Саюз». Ініцыяваў з’яўленне партыі Сяргей Лушч, вядомы дзеяч расейскага руху ў Беларусі, у мінулым прадстаўнік неанацысцкай секты. Ён неаднаразова выступаў правадніком ідэй «Рускага свету» ў Беларусі, карыстаецца падтрымкай расейскіх структур пра-імперскага толку. Нават на ўстаноўчы зʼезд партыі ў Беларусь прыбылі прадстаўнікі так званай ДНР эпохі Захарчанкі і прадстаўнік Севастопаля, які рыхтаваў анексію Крыму.

Устаноўчы з’ез прарасейскай партыі. Фота: Facebook Паўлюк Быкоўскі

Мінюст адзначае, што заснавальнікі парушылі ўсталяваны парадак стварэння палітычнай партыі, а таксама прадставілі несапраўдныя дакумент.

«Паводле дакументаў у якасці заснавальнікаў палітычнай партыі» Саюз «выступіла 1023 асобы. Пры правядзенні міністэрствам юстыцыі выбарачнага правярання звестак аб асобах, якія ўтрымліваюцца ў спісе заснавальнікаў палітычнай партыі (праверана 150 з 1023 заснавальнікаў), у дачыненні да 26 асобаў устаноўлена, што такія людзі з названымі ў спісе персанальнымі дадзенымі адсутнічаюць. Такім чынам, прадстаўленыя дакументы не пацвярджаюць наяўнасць у палітычнай партыі »Саюз« не менш чым 1000 заснавальнікаў», – паведамілі ў ведамстве.

Акрамя гэтага чыноўнікі выявілі і шэраг іншых недакладнасцяў, у сувязі з чым, адмовілі партыі ў рэгістрацыі.

Мінюст адмовіў у рэгістрацыі прарасейскай партыі «Саюз»

Адвакат Сяргей Зікрацкі з’ехаў у Вільню

Адвакат Сяргей Зікрацкі з’ехаў з Беларусі. З 1 траўня яго часовым домам стане Вільня, паведамляе адвакат у сваім Facebook.

На сваёй старонцы Зікрацкі напісаў, што ў Беларусі яго пазбавілі любімай прафесіі і бізнесу, але ён спадзяецца хутка вярнуць у свабодную краіну.

«Мяне пазбавілі маёй любімай прафесіі, пазбавілі майго бізнесу. Ці павінен я гневацца і злавацца на гэтую краіну? Гневацца – так, злавацца на краіну – не. Я люблю Беларусь, і разумею, што тое зло, якое адбываецца сёння ў маёй краіне, робяць пэўныя людзі. І гэтыя людзі не маюць нічога агульнага з Беларуссю».

Адвакат Сяргей Зікрацкі падчас пасяджэння над журналісткамі Кацярынай Андрэевай і Дар’яй Чульцовай. 9 лютага 2021 году. Фота: ТК / Белсат

«Таму я не магу злавацца на Беларусь, а маю намер працягваць рабіць усё магчымае, каб змяніць сітуацыю ў Беларусі. На жаль, у бягучых рэаліях я не магу гэтага рабіць у Менску.

З 1 траўня маім часовым домам стане Вільня.

Вельмі спадзяюся хутка вярнуцца ў свабодную Беларусь», – напісаў адвакат.

Павел Латушка анансаваў новую акцыю

Павел Латушка заявіў нямецкім журналістам, што разлічвае на масавую дэманстрацыю пратэсту супраць рэжыму Лукашэнкі 9 траўня, у Дзень Перамогі, перадае «Deutsche Welle».

«Праз сацсеткі я заклічу беларусаў выйсці на вуліцы. Калі Лукашэнка дазволіць збіць пратэстоўцаў 9 траўня, ён увойдзе ў беларускую гісторыю як фашыст», – заявіў Латушка.

Віцэ-дырэктар Купалаўскага тэатру, віцэ-міністр культуры Беларусі, кіраўнік і заснавальнік Народнага Антыкрызіснага Упраўлення (НАУ) Павел Латушка. Са спецрэпартажу Белсата «Няродны кут». Фота: ЮШ / Белсат

Паводле кіраўніка Народнага антыкрызіснага ўпраўлення, ён сам і іншыя сябры дэмакратычнага руху – гэта група экспертаў, «гатовых узяць лёс краіны ў свае рукі». Латушка адзначыў, што некаторыя чальцы гэтай каманды застаюцца ў Беларусі. Аднак не стаў называць імёнаў, адзначыўшы, што інакш ім пагражае неадкладны арышт.

Цяперашні пераслед апазіцыі ў Беларусі Павел Латушка назваў самым страшным у Еўропе за апошнія 40 гадоў. «Рэпрэсіі праніклі ва ўсе пласты грамадства», – адзначыў ён, дадаўшы, што цяпер беларускі парламент працуе над законам, які дазволіць сілавікам страляць па дэманстрацыях без папярэджання.

Павел Латушка анансаваў новую акцыю пратэсту

СК belsat.eu

Hавiны