Сёння, 2 снежня, Boeing-747 авіякампаніі «Iraqi Airways» здзейсніў апошні эвакуацыйны рэйс з мігрантамі, якія пажадалі вярнуцца на радзіму. Самалёт вылецеў з менскага аэрапорту ў накірунку сталіцы іракскага Курдыстана – гораду Эрбіль.
Усяго на рэйс зарэгістравана 427 пасажыраў. З іх 12 дзяцей да 2 год, паведамляе прэс-служба менскага аэрапорту.
Папярэднія эвакуацыйныя рэйсы Менск-Эрбіль, якія былі запланаваны на 28, 29 і 30 лістапада, былі адменены і перанесены на 2 снежня, нібыта з-за таго, што самалёты не былі запоўнены.
Паводле прадстаўніка Міністэрства міграцыі і перамешчаных асобаў Іраку рэйс 2 снежня мусіць стаць апошнім.
Усяго кампанія «Iraqi Airways» зладзіла шэсць гуманітарных рэйсаў Менск-Эрбіль, на якіх грамадзяне Іраку вярталіся з Беларусі дадому. Агулам такімі рэйсамі было перавезена 2303 чалавека.
Таксама паведамляецца, што сёння ў лагістычны цэнтр на беларуска-польскай мяжы, дзе ўтрымліваюцца мігранты, прыехала дэлегацыя МЗС Ірану.
Іранскія дыпламаты абяцаюць дапамагчы ахвотным уцекачам аднавіць дакументы і вярнуцца дадому. Калі такіх у Беларусі будзе шмат, яны гатовы арганізаваць рэйс і купіць авіябілеты ў Іран.
У лагістычным цэнтры яны хочуць азнаёміцца са становішчам і паразмаўляць з Чырвоным Крыжом.
Фота вокладкі: NAVZLET tv
За падрыхтоўку матэрыяла дзякуем Тэлеграм-канал «ОтВинта | Авиация Беларуси»
АД belsat.eu