Дарадца Святланы Ціханоўскай у міжнародных пытаннях Франак Вячорка лічыць, што перанос Міжнароднай арганізацыяй грамадзянскай авіяцыі (ICAO) дакладу адносна пасадкі самалёту «Ryanair» у Менску можа быць слушным крокам.
«З нейкіх прычынаў лукашэнкаўская дэлегацыя ў ICAO зацікаўленая ў тым, каб хутчэй закончыць расследаванне па захопе самалёта «Ryanair». Перанос публікацыі дакладу на люты можа яшчэ аказацца слушным крокам. Следчая група атрымлівае новыя дадзеныя, якія не на руку рэжыму», – заявіў Вячорка.
Паводле яго, сярод іншага, ICAO разглядае магчымасць накладання санкцыяў і перадачы справы ў Раду бяспекі ААН.
«Перанос публікацыі справы не паўплывае на права Польшчы і Літвы падаць зыск супраць Беларусі ў Міжнародны суд ААН», – дадаў Вячорка.
Нагадаем, што Самалёт «Ryanair» 23 траўня зрабіў вымушаную пасадку ў Менску пасля інфармацыі аб «мінаванні», якую экіпаж атрымаў ад беларускіх дыспетчараў. На даручэнне Лукашэнкі для суправаджэння пасажырскага самалёта ў неба ўзняўся знішчальнік МіГ-29. Блогер Раман Пратасевіч, які ляцеў гэтым рэйсам, і ягоная сяброўка Соф’я Сапега былі затрыманыя. Вымушаная пасадка самалёта была справакаваная беларускімі спецслужбамі менавіта дзеля захопу апазіцыйнага блогера.
Інцыдэнт з рэйсам «Ryanair» выклікаў міжнародны скандал: палітыкі, дыпламаты і міжнародныя арганізацыі рэзка асудзілі дзеянні ўладаў Беларусі. Інцыдэнт з рэйсам Афіны – Вільня пацягнуў увядзенне жорсткіх санкцыяў супраць рэжыму Лукашэнкі.
ICAO збіралася завершыць расследаванне менскага інцыдэнту яшчэ ў верасні, але справа зацягнулася. Прамежкавы даклад збіраліся апублікаваць 25 кастрычніка, але не зрабілі і гэтага. На сайце ICAO свежых публікацыяў пра Беларусь на момант публікацыі няма.
Паводле звестак Народнага антыкрызіснага ўпраўлення, даклад плануецца апублікаваць толькі 22 лютага 2022 года.
МГ belsat.eu