Вынікі пошуку для:

Цытавала Бахарэвіча па-беларуску, казала пра маральны выбар і сумленне. Апошняе слова Калеснікавай

Марыя Калеснікава і Максім Знак выступілі з апошнім словам у судзе 31 жніўня. Паседжанне было закрытым, адвакаты – пад падпіскай аб неразгалашэнні. Тэлеграм-канал Віктара Бабарыкі распавёў, што атрымалася даведацца пра апошняе слова прадстаўнікоў Каардынацыйнай Рады.

Марыя Калеснікава распачала выступ на беларускай мове, з урыўку з твору пісьменніка Альгерда Бахарэвіча, які ёй нехта даслаў у лісце. Далей Марыя зазначыла, што працэс над ёй і Максімам гістарычны, незалежна ад таго, якім будзе рашэнне.

Закрыты суд над Калеснікавай і Знакам

Калеснікава казала пра маральны выбар, сумленне, павагу і любоў да людзей. Пра тое, што нельга ігнараваць тое, што напісана ў Канстытуцыі.

Марыя падзякавала ўсім адвакатам, якія былі пазбаўленыя права на прафесію падчас гэтага працэсу, і скончыла свой выступ словамі пра будучыню Беларусі.

Пракурор запатрабаваў тэрмін для Знака і Калеснікавай, але адвакат не можа распавесці нават пра гэта

Суд некалькі разоў перабіваў Калеснікаву падчас апошняга слова, бо лічыў, што ейныя выказванні не датычаць справы, зазначае «Радыё Свабода». Аднак палітык сказала ўсё, што хацела.

Марыя Калеснікава і Максім Знак знаходзяцца пад вартай з верасня 2020 году. Суд над імі распачаўся 4 жніўня, праходзіў у закрытым рэжыме. Абодвух абвінавачваюць у:

  • закліках да дзеянняў, накіраваных на прычыненне шкоды нацыянальнай бяспецы Рэспублікі Беларусь
  • змове з мэтай захопу ўлады неканстытуцыйным шляхам
  • стварэнні экстрэмісцкага фармавання і кіраванні ім.

Прысуд Марыі Калеснікавай і Максіму Знаку вынесуць 6 верасня а 12.00 у судзе Менскага раёну па адрасе: г.Менск, вул.Маякоўскага, 119а. Пракурор запрасіў для абодвух па 12 гадоў пазбаўлення волі.

ГГ, belsat.eu

 

Падпісвайся на telegram Белсату

Hавiны