Падчас суда па «справе аб дзяржперавароце» палітзняволены Аляксандр Фядута заявіў хадайніцтва аб неабходнасці медыцынскага агляду ў сувязі з дрэнным самаадчуваннем. Пасяджэнне было вырашана завяршыць раней, паведамляюць праваабаронцы.
Суд працягнецца заўтра, 3 жніўня, у 10:00.
У Менскім абласным судзе 2 жніўня прайшло чарговае паседжанне па «справе аб змове з мэтай захопу дзяржаўнай улады». Сярод абвінавачаных палітзняволеныя палітолаг і літаратуразнаўца Аляксандр Фядута, кіраўнік партыі БНФ Рыгор Кастусёў, юрыст Юры Зянковіч, супрацоўніца менскага офісу Зянковіча Вольга Галубовіч, актывіст і дальнабойшчык Дзяніс Краўчук. Судовы працэс у адкрытым рэжыме вядзе суддзя Уладзімір Арэшка.
Фядута прызнаў віну часткова, Кастусёў і Зянковіч – не прызналі віну, Краўчук і Галубовіч – прызналі віну цалкам.
Трэці дзень суда па «справе аб змове з мэтай захопу дзяржаўнай улады» пачаўся з допыту Аляксандра Фядуты, а пасля пачаўся допыт палітзняволенай Вольгі Галубовіч – яна абвінавачваецца толькі па ч. 1 арт. 342 Крымінальнага кодэксу («Актыўны ўдзел у дзеяннях, якія груба парушаюць грамадскі парадак»).
Алена Рувіна belsat.eu