На судзе ў справе «змовы аб захопе дзяржаўнай улады» дапытваюць Аляксандра Фядуту
Праваабаронцы паведамляюць, што трэці дзень разгляду справы «аб змове з мэтай захопу дзяржаўнай улады» пачаўся з допыту палітвязня Аляксандра Фядуты.
Палітзняволены палітолаг і літаратуразнаўца Аляксандр Фядута на судовым паседжанні ў справе «аб змове з мэтай захопу дзяржаўнай улады» заявіў, што не прызнае сябе вінаватым «перш за ўсё паводле абцяжарвальных абставінаў – што злачынства было здзейснена з нізкіх памкненняў».
«Я таксама не згодны з тым, што ў змоўцаў былі размеркаваныя ролі і функцыі, а таксама што былі нейкія калегіяльныя рашэнні, бо ніякіх галасаванняў не вялося», – сказаў ён.
Аляксандр Фядута распавёў, што ў гэтую гісторыю яго ўцягнуў Юрый Шчыгельскі, які жыве ў ЗША.
«Лічу, што сапраўдным арганізатарам змовы быў Шчыгельскі, а сувыканаўцам быў Зянковіч», – сказаў ён.
Падчас паседжання Юрый Зянковіч заявіў, што выкажа сваё прызнанне або непрызнанне віны ў справе на наступным этапе судовага следства, калі ўсе абвінавачваныя дадуць паказанні.
Алена Аляксандрава belsat.eu
