Беларускі Хельсінкскі Камітэт накіраваў спецдакладчыкам ААН паведамленне пра катаванне абвінавачаных у «справе Аўтуховіча». У дачыненні да фігурантаў справы чыноўнікі ўжываюць псіхалагічныя і фізічныя катаванні, пазбаўляюць права на перапіску і медычную дапамогу, паведамляе БХК.
Спецыяльныя дакладчыкі ААН па пытанні аб катаваннях, па пытанні аб праве на здароўе, па пытанні аб незалежнасці суддзяў і адвакатаў, па сітуацыі з правамі чалавека ў Беларусі атрымалі паведамленне з боку Беларускага Хельсінкскага Камітэту пра грубыя парушэнні правоў чалавека ў дачыненні да абвінавачаных па справе Мікалая Аўтуховіча.
Паводле звестак БХК, абвінавачаных утрымліваюць у негуманных умовах, прамяняюць псіхалагічныя і фізічныя катаванні, пазбаўляюць магчымасці весці перапіску і не даюць неабходную медычную дапамогу.
«Мы звярнулі ўвагу спецыяльных дакладчыкаў на тое, што Мікалай Аўтуховіч ужо 22 дзень трымае сухое галадаванне на знак пратэсту супраць абмежаванняў па перапісцы, а таксама распавялі пра цяжкі стан яго здароўя і бесчалавечныя ўмовы ўтрымання», – паведамляе БХК.
Праваабаронцы прывялі факты жорсткага абыходжання ў дачыненні да Уладзіміра Гундара, пра скаргі Галіны Дзербыш, Любові і Сяргея Разановічаў, Ірыны Мельхер на праблемы са здароўем, а таксама Паўла Разановіча на прымяненне супраць яго фізічных і псіхалагічных катаванняў з мэтай прымусіць падпісаць загадзя падрыхтаваныя паказанні.
Нягледзячы на тое, што судовы працэс па справе Аўтуховіча адбываецца ў адкрытым рэжыме, фактычна на яго пусцілі толькі некалькі сваякоў і прадстаўнікоў выключна дзяржаўных СМІ.
Алена Аляксандрава belsat.eu