Крысціна Ціманоўская едзе ў Польшчу і рэкордная колькасць мігрантаў за содні. Галоўнае за 2 жніўня
«Белсат» падводзіць вынікі 2 жніўня – 359-га дня беларускага паслявыбарчага пратэсту.
Крысціна Ціманоўская атрымала гуманітарную візу ў Польшчу
Беларуская лёгкаатлетка Крысціна Ціманоўская, якая здолела пазбегчы прымусовага вывазу на радзіму, атрымала польскую візу. Пра гэта паведаміў у Twitter намеснік кіраўніка МЗС Польшчы Марцін Пшыдач.
Паводле яго, Польшча зробіць усё магчымае, каб дапамагчы Ціманоўскай працягнуць спартовую кар’еру.
Муж атлеткі Арсеній Зданевіч, які экстранна з’ехаў з Беларусі ва Украіну, у каментары «Еўрарадыё» заявіў, што «ўся праблема ў тым, што нашы кіраўнікі, яны няправільна дзейнічаюць, яны нават не вывучаюць спартоўцаў, якія яны віды будуць рабіць, усё гэта вядома ў апошні момант».
У Літве ў намётавым лагеры для мігрантаў адбыліся беспарадкі
У намётавым лагеры для мігрантаў на Руднінкайскім палігоне ў Літве пачаліся беспарадкі. У паліцыю паведамілі, што незадаволеныя мігранты спрабавалі збегчы.
У МУС Літвы паведамілі, што мігранты ўзбунтаваліся з-за змоклых намётаў. Мужчыны, якія сабраліся каля плота, выказалі незадаволенасць у сувязі з умовамі жыцця ў лагеры.
Адзін малады чалавек, які гаворыць па-ангельску, гучна крычаў і заявіў, што мігранты не будуць ёсць ежу, якую ім прыносяць, не будуць піць ваду дзіўнага колеру і не адыдуць ад плота. Яны патрабуюць, каб іх выпусцілі з лагера.
Знік кіраўнік Беларускага дому ва Украіне Віталь Шышоў
Сёння раніцаю ён выйшаў на штодзённую прабежку і не вярнуўся. З ягонага нумара было зроблена некалькі так званых «глушцоў», аднак цяпер звязацца з ім немагчыма. Больш на сувязь ён не выходзіў, паліцыя вядзе пошукі.
Знаёмыя Віталя Шышова распавялі «Белсату», што раней за ім ужо сачылі невядомыя падчас прабежак. Таксама да яго і да ягонай дзяўчыны падыходзілі падазроныя людзі, спрабавалі размаўляць.
Спецслужбы праслухоўвалі тэлефон Сцяпана Латыпава за тры месяца да яго затрымання
Спецслужбы праслухоўвалі тэлефон Сцяпана Латыпава з чэрвеня 2020 года. Гэта стала вядома 2 жніўня, падчас разгляду крымінальнай справы супраць палітзняволенага жыхара плошчы Пераменаў.
На паседжанні памочнік пракурора Уладзімір Рабаў агучыў стэнаграмы тэлефонных размоваў палітвязня, якія былі атрыманыя падчас праслухоўвання, якое спецслужбы вялі з чэрвеня 2020 года. Адвакатка на судзе звярнула ўвагу, што дакументы, якія агучваюцца, працэсуальна не аформленыя належным чынам: у іх няма назвы, яны не з’яўляюцца пратаколамі. Але суддзя сказаў, каб адвакатка агучыла гэта ў спрэчках бакоў.
Улады хочуць зліквідаваць таварыства, якое з’яўляецца ўласнікам медыя-рэсурсу «Hrodna.life»
Пракуратура Горадні падала ў суд пазоў аб ліквідацыі ТАА «Гораднялайфмедыя» – уласніка медыя-рэсурсу «Hrodna.life». Працэс аб ліквідацыі таварыства пачнецца 11 жніўня ў Эканамічным судзе Гарадзенскай вобласці.
Нагадаем, што 9 ліпеня ў судзе Ленінскага раёну Горадні прайшло пасяджэнне суда, у выніку якога тэлеграм-канал «Hrodna.life» прызналі экстрэмісцкім.
Святлана Ціханоўская завяршыла двухтыднёвы візіт у ЗША
Акрамя сустрэчаў з кіраўніком Белага дому ды іншымі топ-чыноўнікамі ды вядомымі грамадскімі дзеячамі, «самаю класнаю часткаю праграмы», паводле Святланы, сталі спатканні з беларускай дыяспарай.
Лідарка дэмакратычных сілаў паспела пабачыцца з суайчыннікамі ў Вашынгтоне, Нью-Ёрку, Сан-Францыска, Лос-Анджэлесе і Крэмніевай даліне. Беларусы адмыслова прыязджалі з іншых штатаў і гарадоў, праводзячы гадзіны ў дарозе, каб хоць некалькі хвілін жыўцом паглядзець на сімвал новай Беларусі.
АД, belsat.eu
