У Ленінскім судзе Менску пачалі судзіць выпускніцу юрфаку Кацярыну Віннікаву, паведамляе Telegram-канал law_verum. Дзяўчыну затрымалі пасля ейнага выступу падчас уручэння дыпломаў. Кацярына выказала падзяку палітвязню Максіму Знаку і згадала іншых палітвязняў.
Выпускніца юрфаку Кацярына Віннікава падчас уручэння дыпломаў са сцэны падзякавала Максіму Знаку, звольненым выкладчыкам, а таксама згадала юрыстаў-палітвязняў.
«Нізкі паклон Алене Уладзіміраўне Лаеўскай, Кацярыне Віктараўне Новікавай, Аляксею Іванавічу Сахарчуку, Алене Іванаўне Басалай, Максіму Аляксандравічу Знаку. Дзякуй за тое, што паказалі ўласным прыкладам, хто такі юрыст і што такое права!» – сказала дзяўчына.
Пасля гэтай прамовы выпускніцу затрымалі. Сёння Кацярыну пачалі судзіць. Дзяўчыну абвінавачваюць паводле двух артыкулаў КаАП: арт. 24.3 («Непадпарадкаванне законнаму распараджэнню ці патрабаванню службовай асобы») і арт. 24.23 («Парушэнне парадку арганізацыі або правядзення масавых мерапрыемстваў»).
Пры адвакату склалі толькі адзін пратакол, пра другі стала вядома ўжо на судзе.
Суддзя Марына Клімчук у выніку пакарала дзяўчыну на 15 содняў арышту.
СК belsat.eu