Найбуйнейшая палітычная сіла Еўразвязу заклікала не дыскрымінаваць, а падтрымліваць беларусаў
Еўрапейская народная партыя прыняла рэзалюцыю, у якой заявіла, «што Беларусь нельга параўноўваць з нелегітымным рэжымам Лукашэнкі, які гандляваў беларускім суверэнітэтам і дапусціў прысутнасць расейскага войска на беларускай зямлі ў сілу сваёй поўнай экзістэнцыйнай залежнасці ад пуцінскага рэжыму».
«Мы не прызнаем нелегітымны рэжым Лукашэнкі як прадстаўнікоў беларускага народу. Мы заклікаем еўрапейскіх лідараў і ўрады падвоіць свае намаганні для падтрымкі барацьбы беларускага народу за свабоду і дэмакратыю, а таксама забяспечыць ужыванне максімальна адрасных санкцый супраць Лукашэнкі і чальцоў ягонага нелегітымнага рэжыму, якія прыгнятаюць беларускі народ і дапамагаюць пуцінскай агрэсіі супраць Украіны», – гаворыцца ў заяве.
Паводле яе, дыскрымінацыя беларусаў недапушчальная, а «шараговыя беларусы ў Еўразвязе павінны мець доступ да юрыдычных паслуг, прапіскі, вучобы, банкаўскіх паслуг і г.д».
«Мы заклікаем усе краіны, якія прымуць законы аб дапамозе ўкраінскім уцекачам вайны, уключыць беларусаў-уцекачоў з Украіны, якія перасеклі яе мяжу пасля 24 лютага 2022 года, і прыраўняць іх да ўкраінцаў», – адзначылі ў ЕНП.
Партыя заклікала «ўсе дэмакратычныя краіны Еўропы і свету прымаць палітычных бежанцаў з Беларусі, працягваць падтрымліваць праграмы для беларусаў у сферы адукацыі, падтрымкі бізнесу, лячэння і г.д»., забяспечваць умовы, магчымасці для перамяшчэння беларускага прыватнага бізнесу.
ЕНП падтрымлівае аб’яднаныя дэмакратычныя сілы Беларусі, іх лідара Святлану Ціханоўскую, правацэнтрысцкую кааліцыю, у якую ўваходзяць сябры ЕНП – Беларуская хрысціянская дэмакратыя, Аб’яднаная грамадзянская партыя і Рух за свабоду, а таксама Каардынацыйную раду, і патрабуе вызвалення палітвязняў.
Еўрапейская народная партыя – найбуйнейшая палітычная сіла ў Еўропе. Яе прадстаўнікі сярод іншага ўзначальваюць Еўрапейскі парламент і Еўрапейскую камісію, а таксама ўрады шмат якіх краін. На яе з’ездзе ў Ратэрдаме выступала Святлана Ціханоўская.
Макар Мыш belsat.eu
