Украінскія гарады сёмы дзень пад расейскімі абстрэламі. Снарады і ракеты трапляюць не толькі ў вайсковыя аб’екты, але і ў жылыя будынкі і на плошчы гарадоў. Сярод найбольш пацярпелых гарадоў – пераважна расейскамоўны і некалі даволі прарасейскі Харкаў.
Паветраныя трывогі штодзень гучаць практычна ва ўсіх буйных гарадах Украіны, ад Львова на захадзе да Марыупалю на паўднёвым усходзе, ад невялікіх Сумаў да сталіцы – Кіева. Найбольш пацярпелымі называюць Херсон, паўночна-заходнія прадмесці і раёны Кіева, а таксама Харкаў.
У Харкаве ракетамі абстралялі будынкі Гарадской рады, Службы бяспекі Украіны, Нацыянальнай паліцыі, Харкаўскага нацыянальнага ўніверсітэту, Палац працы, шматпавярховыя будынкі.
Мэр Харкава Ігар Церахаў казаў днём раней, што горад пратрымаецца да перамогі, а сам ён гатовы да ўсяго, абы адстаяць Харкаў.
Дакладную колькасць загінулых ад дзеянняў расейскіх войскаў ва Украіне цяжка падлічыць, але паводле папярэдніх ацэнак украінскага боку, загінулі ўжо каля дзвюх тысяч чалавек.
Да расейскай атакі ў Харкаве жылі звыш 1,4 млн чалавек, а ў харкаўскай агламерацыі – звыш 2,1 млн. Колькі людзей цяпер засталася ў горадзе, невядома.