У судзе Заводскага раёну разглядаецца крымінальная справа ў дачыненні ўдзельніка пратэстаў Івана Зубко. Яму выставілі абвінавачанне паводле арт. 342 Крымінальнага кодэксу («Арганізацыя і рыхтаванне дзеянняў, што груба парушаюць грамадскі парадак, альбо актыўны ўдзел у іх»). Суддзя – Дзмітрый Астапенка.
Крымінальную справу супраць Івана Зубко распачалі за ўдзел 1 лістапада ў пратэстах (Марш супраць тэрору). На мінулым тыдні за тую ж акцыю і паводле таго ж артыкулу судзілі ягоную нявесту Рэнату Смірнову. 19-гадовую дзяўчыну пакаралі двума гадамі «хатняй хіміі».
І Івану, і Рэнаце «Менсктранс» выставіў пазоў на суму 10 680 рублёў за тое, што яны нібыта блакавалі рух транспарту шляхам выхаду на дарогу і нанеслі такім чынам шкоду прадпрыемству. Хаця сілавікі самі перакрылі рух, і толькі тады людзі пачалі выходзіць на дарогу, бо яна была пустая.
1 лістапада Івана Зубко жорстка затрымалі, цягнулі за шыю. Рэната ўбачыла гэта, прасіла не душыць, і пайшла за ім у аўтазак, але ёй сказалі ісці дадому. Яна была супраць, тады яе затрымалі. У аўтазаку ўзялі за валасы і паставілі на калені, распавяла Рэната на сваім судзе.
Сёння Рэната Смірнова прысутнічае на судовым працэсе над Іванам Зубко ў якасці сведкі. Акрамя яе паказанні далі два амапаўцы, якія не памятаюць Івана на акцыі і не затрымлівалі яго, а проста распавялі пра падзеі таго дня.
Іван распавёў, што выйшаў на акцыю супраць гвалту, які застаецца беспакараным, супраць вынікаў выбараў і хлусні пра каронавірус. Хлопец распавёў пра падзеі таго дня, згадаў, што сілавікі стаялі за 10–15 метраў з нацэленай зброяй, хаця на такой адлегласці нельга накіроўваць зброю на людзей.
Пракурор запытала яго наконт бел-чырвона-белага сцяга, і Іван сказаў, што лічаць яго сцягам беларускай нацыі.
Пракурор Вікторыя Кунцэвіч запрасіла для 25-гадовага Івана Зубко пакаранне ў выглядзе абмежаванне волі («хімія) на 3 гады.
У апошнім слове Іван Зубко сказаў:
«Я хачу падзякаваць дзяржаве за прадстаўленую мне магчымасць пасядзець 93 дні, бо менавіта там я ўсвядоміў сапраўдную каштоўнасць сям’і. І немэтазгоднасць выхаду на пратэст са сцягамі, з плакатамі, з кветкамі ў руках і казаць што-небудзь тым, у каго ў руках дубінкі, святлошумавыя гранаты і поўная недатыкальнасць. Бо за гэта іх узнагароджваюць медалямі і ордэнамі, павышаюць у званнях і пасадах. Я шчыра веру, што любая хлусня спараджае яшчэ большую хлусню, як і любы гвалт спараджае яшчэ большы гвалт. Таму я прашу не быць сёння галаслоўным, а быць толькі справядлівым».