Вядомаму беларускаму журналісту Алегу Груздзіловічу ўручылі прэмію «Надзея свабоды». Узнагароджанне адбылося падчас Форуму вольнай журналістыкі, які праходзіць у Вільні, паведамляе БАЖ.
Узнагароду ўручаў старшыня камітэту ў справе эканомікі Сейму Літвы Казіс Старкявічус (Kazys Starkevičius). Прэмія Алегу Груздзіловічу прызначаная за адданасць абавязку журналіста.
Літоўскаю «Надзеяй свабоды» ўганароўваюць беларускіх незалежных журналістаў трэці год запар. Летась прэміяй быў адзначаны Андрэй Аляксандраў, а ў 2020 годзе – Кацярына Барысевіч, Алена Таўкачова, Таццяна Каравянкова, Кацярына Андрэева і Дарʼя Чульцова.
Алег Груздзіловіч працаваў на радыё «Свабода». Паводле палітычна матываванага абвінавачання яму прысудзілі 1,5 года зняволення ў калоніі агульнага рэжыму. Ён адбыў за кратамі 9 месяцаў. Пасля вызвалення журналіста зʼявілася інфармацыя, што ўлады ўнеслі яго ў спіс экстрэмістаў.
Антон Тачняк belsat.eu
