Улады Польшчы збіраюцца скасаваць аўтаматычны працяг дзеяння візаў і картак побыту (відаў на жыхарства) праз стан эпідэмічнай пагрозы. Адпаведны законапраект Рада міністраў плануе ўхваліць да канца года, паведамляецца на ўрадавым партале gov.pl.
На польскім урадавым партале gov.pl апублікавалі законапраект, які ў асноўным тычыцца легалізацыі ўкраінцаў, што ўцяклі ад вайны. Але ў ім ёсць і палажэнні, якія наўпрост закрануць беларусаў з візамі, карткамі побыту і іншымі дакументамі, тэрмін дзеяння якіх аўтаматычна працягваўся праз стан эпідэмічнай пагрозы. Гэтую норму плануюць адмяніць. Калі законапраект прымуць, ва ўладальнікаў такіх дакументаў будзе 30 дзён, каб легалізавацца ці з’ехаць з Польшчы.
Урад плануе да канца года ўхваліць законапраект і накіраваць яго ў парламент. Калі дакумент будзе канчаткова прыняты, пакуль не вядома, але ўсе навацыі, што тычацца ўкраінскіх грамадзянаў, разглядаюць даволі хутка.
Паводле апошніх звестак, цяпер у Польшчы жывуць амаль 60 тысяч беларусаў, што маюць дзейны дакумент, які дае права перабываць у краіне. З жніўня 2020 года грамадзяне Беларусі атрымалі больш за 43 тысячы гуманітарных візаў, амаль 59 тысяч візаў паводле праграмы «Poland.Business Harbour» для рэлакацыі айцішнікаў і яшчэ 78 тысяч 700 візаў па картцы паляка.
Сяргей Крот belsat.eu