Суд Смаргонскага раёну 29 кастрычніка вынес прысуд жыхару Смаргоні Дзмітрыю Дудойцу, паведамляюць праваабаронцы «Вясны».
Яго абвінавацілі ў знявазе прадстаўніка ўлады ў сувязі з выкананнем ім службовых абавязкаў, здзейсненай у інфармацыі, якая размешчана ў сетцы Інтэрнэт (арт.369 КК РБ).
Па матэрыялах абвінавачвання, Дзмітрый яшчэ да леташніх прэзідэнцкіх выбараў, 21 чэрвеня 2020 года, у сацыяльнай сетцы «Аднакласнікі» на старонцы Вольгі Карач з дапамогай ненарматыўнай лексікі ахарэктэрызаваў начальніка Ганцавіцкага РАУС Віталія Куляшова, пакінуўшы пад ягоным фота каментар «Скаціна лысая, хутка прыйдзе наш час…».
Справу разглядаў суддзя Сяргей Боландзь, які прысудзіў абвінавачанаму абмежаванне волі тэрмінам на два гады, з адбываннем пакарання ў папраўчай установе адкрытага тыпу.
АД, belsat.eu