240 школ, універсітэты, Нацыянальная бібліятэка, Лепельскі райвыканкам: куды прыйшлі паведамленні пра бомбы
З раніцы 1 кастрычніка розныя ўстановы ў Беларусі, пераважна школы, каледжы і ўніверсітэты, атрымліваюць рассылку пра закладзеныя бомбы. Паўсюль праводзіцца эвакуацыя. Паведамленняў пра знойдзеныя выбуховыя прылады пакуль не было. Мы сабралі, што вядома пра масавае мінаванне ў гэтую пятніцу.
У першай палове дня эвакуявалі студэнтаў і выкладчыкаў з будынкаў БДУ і БДАТУ, а таксама чытачоў і супрацоўнікаў з Нацыянальнай бібліятэкі – туды таксама прыйшло паведамленне пра бомбу.
Чытачы «Белсату» паведамлялі, што студэнтаў не пускалі ў будынкі фізфаку, юрфаку БДУ, корпус БДАТУ на Маскоўскай.
Таксама вядома пра эвакуацыю ў БГМУ, БГПУ, БГАС, БГАА, МГЛУ, Акадэміі кіравання, ліцэі БДУ і юрыдычным каледжы БДУ.
У другой палове пятніцы нашыя чытачы распавялі пра эвакуацыю галаўнога аддзелу ААТ «Інтэграл», а таксама пачалі дасылаць паведамленні пра масавае мінаванне школ па ўсёй Беларусі.
Паведамлялі пра выбуховыя прылады ў Falcon Club Arena, гатэлі Marriott, Доме прэсы, Доме футболу.
На 17.30 нам вядома пра эвакуацыю ў наступных школах:
Менск: гімназія 11 – эвакуацыя праходзіла прыкладна а 14-й гадзіне, гімназіі №16, 28 – дзяцей эвакуявалі ў 15.40, прыехалі сапёры, 29, 38, 42, дзіцячы садок №31, школы №25, 60, 80, 95, 128, 186, 196, 197.
Пра школу № 196 чытачы напісалі наступнае:
«Дзяцей з другой змены таксама адпусцілі дамоў. Дзецям прычыну не агучылі. Другая змена пачалася а 14-й. Пасля першага ўроку і абеду ў сталовай пачалі не спяшаючыся эвакуяваць».
Эвакуявалі таксама школу №9 у Брылевічах.
«Дачка прыйшла да дому, дакладна не ведаю, чаму: хто кажа – замінавалі, а хтосьці, што пажар, але пажарных навокал няма», – пісаў чытач пра Брылевічы.
Берасце: гімназія №1, школы № 10, 13, 22, 27, 28, 30, 33.
«Усіх выгналі са школы, рэчы выдаюць праз вокны, што адбываецца ніхто не разумее», – распавядае наша крыніца пра тое, як праходзіла эвакуацыя.
У Берасці эвакуявалі таксама БрГТУ.
Баранавічы: школа №19.
«Замінавалі» таксама школу ў гарадскім пасёлку Гарадзішча.
У Лепелі паведамленні пра бомбы прыйшлі ў Бароўскую сярэднюю школу Лепельскага раёну, а таксама ў Лепельскі райвыканкам.
У Крычаве навіну пра «мінаванне» атрымалі ў Аддзеле прымусовага выканання.
Хваля «замінаванняў» прайшла таксама ў Горадні. Паведамленні аб бомбе былі адасланыя ў Гарадзенскі аграрны і медыцынскі ўніверсітэты, кардыядыспансер, абласны шпіталь, абласное ўпраўленне міністэрства юстыцыі і іншыя. Да ўсіх будынкаў прыехалі сапёры, МНС і хуткая дапамога.
У Віцебску і Полацку паведамленні пра бомбы прыйшлі ва ўніверсітэты – ВГАВМ, ВГУ, ПГУ.
Паводле УУС Віцебскага аблвыканкаму, з-за паведамленняў аб мінаванні былі эвакуяваныя больш за 5000 чалавек. Выбуховых прыладаў не знайшлі.
Паводле крыніцаў «Белсату», паведамленні пра закладзеныя бомбы 1 кастрычніка прыйшлі ў 240 школ па ўсёй Беларусі.
Паведамленні пра бомбы сёння закранулі не толькі Беларусь. Як паведамляюць нашыя карэспандэнты, праз ліст пра мінаванне эвакуявалі людзей з будынку амбасады Беларусі ў Вільні. Паліцыя і ахоўнікі адмовіліся ад каментароў. Вядома таксама пра эвакуацыю Беларускай гімназіі Вільні.
ГГ, belsat.eu
