«Падарунак» да Дня ведаў: у Амельянцы знішчана адзіная ў Камянецкім раёне школа з беларускай мовай навучання

У Беларусі пачаўся новы навучальны год. Вучыцца школьнікам цяпер давядзецца ў новых умовах: пасля загаду Аляксандра Лукашэнкі любым коштам навесці парадак у школах дзяржаўная адукацыя ўзяла курс на мілітарызацыю, палітызацыю і сціслае ўзаемадзеянне з Праваслаўнаю царквой. «Патрыятычны» кірунак павінен быў мець першы ўрок новага навучальнага года. Назвалі яго «Адзінства беларускага народу – аснова незалежнасці краіны». На здымку – дзеці і бацькі на святочнай лінейцы ў адной з барысаўскіх школ, Беларусь. 1 верасня 2021 года.

Фота: Белсат

Змаганне за адзіную беларускамоўную школу ў Камянецкім раёне, што на Берасцейшчыне, цягнулася больш за два гады.

За захаванне амельянецкай школы сабралі больш за тысячу подпісаў. Але ўсё ж школу, якая працавала больш за сорак гадоў, зачынілі.

Летась некаторыя настаўнікі і бацькі змаглі дабіцца таго, што чыноўнікі паабяцалі не зачыняць школу. Але 31 жніўня гэтага года былі пастаўленыя перад фактам – школы ў Амельянцы больш не будзе.

Усіх дзяцей, што вучыліся там перавялі ў школу вёскі Пагранічная. Мясцовыя лічаць, што неабходнасць напаўнення школы ў Пагранічнай і стала прычынай закрыцця Амельянецкай сярэдняй школы, на новым месцы дзеці будуць вучыцца па-расейску, а на ўвесь Камянецкі раён не засталося ніводнай школы з беларускай мовай адукацыі.

МГ belsat.eu