Пра сваё знаходжанне ў спісе асобаў, якіх шукае Інтэрпол, Вольга Вялічка распавяла на сваёй старонцы ў Фэйсбуку. Паводле жанчыны, дадалі яе туды па патрабаванні беларускіх сілавікоў.
«Я ў спісах Інтэрполу. Так-так, разам, з тэрарыстамі, наркагандлярамі ды іншымі. Такое вось прызнанне», – напісала Вольга.
Вольга Вялічка – заснавальніца і дырэктарка дзіцячага госпісу ім.Святага Губерта ў Горадні. Сваімі ўласнымі сіламі жанчына адкрыла госпіс у 2007 годзе.
Заўсёды займала актыўную пазіцыю ў грамадстве.
Увесну 2020 году, падчас пандэміі каронавірусу Вольга арганізавала майстэрню, дзе валанцёры шылі ахоўныя касцюмы для медыкаў.
Пасля пачатку выбарчай кампаніі Вялічка была сябрам ініцыятыўнай групы Віктара Бабарыкі і незалежнай назіральніцай. Пасля выбараў спрабавала стварыць Раду народнага даверу ў Горадні, арганізаваць перамовы з уладамі, выступала на акцыях пратэсту. За ўдзел у мітынгах адседзела содні ў ІЧУ і атрымала штраф.
У майстэрню, дзе шылі касцюмы для медыкаў, тым часам прыйшла праверка з ДФР, валанцёраў выгналі. У госпіс прыйшлі сілавікі, забралі апарат ШВЛ.
У кастрычніку 2020 году Вольга Вялічка з’ехала з Беларусі.
У снежні мінулага году на Вольгу завялі крымінальную справу за нібыта злоўжыванне спонсарскай дапамогай (ч.3 арт.210 Крымінальнага кодэксу Беларусі).
ГГ, belsat.eu