З 1 ліпеня на Берасцейшчыне трэба плаціць за перасячэнне мяжы.
Памер збору складзе базавую велічыню (29 рублёў) за адзін транспартны сродак незалежна ад колькасці пасажыраў.
Такое рашэнне было прынятае яшчэ 24 траўня, яно будзе дзеяць да 1 студзеня 2023 года. Накіраваны такі збор на «барацьбу з каронавіруснай інфекцыяй».
З 1 чэрвеня збор за перасячэнне мяжы пачалі спаганяць у Гомельскай і Гарадзенскай вобласцях.
Дакумент, які пацвярджае выплату збору, трэба прад’явіць у пункце пропуску супрацоўніку органаў памежнай службы ў папяровым ці электронным выглядзе. Аплаціць збор можна да перасячэння мяжы праз банк ці на месцы ў пункце пропуску.
Збор выплачваецца ў той вобласці, дзе размешчаны пункт пропуску. Калі выезд запланаваны праз пункт пропуску Гарадзенскай вобласці, а аплата збору праведзеная ў бюджэт Гомельскай вобласці, збор не лічыцца выплачаным.
Ад выплаты падатку пры наяўнасці пацвярджальных дакументаў вызваляюцца:
- кіроўцы, якія едуць на пахаванне чальцоў сям’і і блізкіх сваякоў, у таксама тыя, хто суправаджае памерлых для пахавання;
- удзельнікі і інваліды Вялікай Айчыннай вайны;
- інваліды I і II групаў, а таксама тыя, хто іх суправаджае;
- удзельнікі ліквідацыі наступстваў катастрофы на Чарнобыльскай АЭС;
- грамадзяне Беларусі, якія выязджаюць на лячэнне ў санаторна-курортныя ўстановы.
АД, belsat.eu
