266-ы дзень пратэстаў. Штраф за бел-чырвоныя шкарпэткі, за красавік асудзілі 100 асобаў за пратэсты
У Беларусі палітычны крызіс працягваецца 266 дзён. Грамадства патрабуе спыненне гвалту, палітычнага пераследу, фальсіфікацыяў і адстаўкі Лукашэнкі. У адказ існы рэжым чыніць масавыя рэпрэсіі супраць сваіх грамадзянаў.
Мітынг без затрыманняў
Партал ФПБ паведамляе, што «15 галіновых прафсаюзаў, якія ўваходзяць у склад Федэрацыі прафсаюзаў Беларусі, выступілі з патрабаваннем адмяніць незаконныя эканамічныя санкцыі ў дачыненні да беларускіх прадпрыемстваў».
Людзі, якія прывялі да амбасады ЗША, крычаць у мегафон «Санкцыям – не!» Іх ніхто не разганяе, каронавірус таксама правядзенню акцыі не перашкаджае.
Мітынг завершыўся вельмі хутка.
Еўразвяз рыхтуе санкцыі
Беларусь унесеная ў парадак дня пасяджэння Рады міжнародных справаў Еўразвязу, якое пройдзе 10 траўня.
«На гэты момант абмяркоўваецца варыянт абвяшчэння 4-га пакета санкцый або непасрэдна 10 траўня, або на працягу працоўнага тыдня 10-15 траўня. Пакуль гэта працоўны варыянт графіка, у які могуць быць унесены карэктывы», – паведаміў судырэктар «Creative Politics Hub» Мікалай Халезін.
Вялікая Субота ў праваслаўных
1 траўня праваслаўныя вернікі адзначаюць Вялікую Суботу – дзень памяці пахавання і знаходжання ў труне Ісуса Хрыста.
У гэты апошні дзень Вялікага посту вернікі працягваюць рыхтавацца да Вялікадня, які традыцыйна выпадае на нядзелю і калі святкуецца ўваскрэшанне Хрыста.
За «пратэсты» ў красавіку асудзілі 98 асобаў
На 1 траўня праваабаронцам вядомыя больш за тысячу фігурантаў крымінальных справаў, якіх пераследуюць паводле палітычных матываў. За кратамі 360 палітвязняў, 196-ці агучылі прысуды, а ў адносінах да 28 палітвязняў працягваюцца судовы паседжанні.
Пры гэтым толькі за красавік бягучага году праваабаронцы прызналі палітвязнямі 39 асобаў. Суды за гэты месяц вынеслі 98 абвінаваўчых прысудаў за пратэсты.
На суд над Севярынцам не пусцяць нават родных
У Магілёве 12 траўня мае пачацца суд на сустаршынёй Беларускай хрысціянскай дэмакратыі Паўлам Севярынцам і прадстаўнікамі «Еўрапейскай Беларусі». Працэс над імі будзе закрытым.
«Суд на Паўлам і «Еўрапейскай Беларуссю» будзе закрытым, нават для родных. Шкада, нічога не даведаемся пра іх сенсацыйнае расследаванне, а можа проста там справа ні аб чым і сорамна, каб гэта проста нехта пабачыў», – паведаміла ў Facebook жонка сустаршыні БХД Вольга Севярынец.
Палітык, Павел Севярынец, БХД
Яна таксама адзначыла, што палітыка пачалі пераводзіць з менскага СІЗА-1 у Магілёў 23 красавіка.
«Везлі цягніком у сталыпінскім вагоне ўсю ноч з рукамі ў кайданках. Каля 8 раніцы даставілі ў магілёўскае СІЗА, а пасля цэлы дзень пратрымалі ў стакане, толькі пад вечар перавёўшы ў камеру. Большасць рэчаў і ўсе лісты, якія даслалі людзі (каля 2 тысяч), яму прыйшлося пакінуць на Валадарцы, бо з рукамі ў кайданках перавезці іх было немагчыма. Аддаць рэчы сям’і не дазволілі, у выніку, хутчэй за ўсё, іх проста выкінулі», – заявіла Вольга Севярынец.
Павел Севярынец знаходзіцца за кратамі з чэрвеня 2020 года. Разам з ім будуць судзіць Яўгена Афнагеля, Паўла Юхневіча, Змітра Казлова, Максіма Вінярскага, Андрэя Войніча. Іх усіх вінавацяць у масавых беспарадках.
Штраф за бела-чырвоныя шкарпэткі
Мянчанку Наталлю затрымалі 25 сакавіка толькі за тое, што на ёй былі шкарпэткі белага колеру з чырвонай паласой. За гэта суд аштрафаваў яе на 80 базавых велічыняў (2320 рублёў), піша Tut.by.
24 сакавіка да Наталлі Сіўцова-Сядушкінай наведаліся міліцыянты. На балконе яе кватэры сілавікі пабачылі чырвоныя і белыя стужачкі. Яны знялі стужкі а на жанчыну склалі пратакол за пікетаванне. 25 сакавіка Наталлю прызналі вінаватай у адміністрацыйным правапарушэнні і суд прызначыў ёй штраф у памеры 70 базавых велічыняў (2030 рублёў).
Вечарам таго ж дня жанчына пасля суда выйшла на курсы кіроўцаў, але па дарозе яе схапілі сілавікі і паведамілі, што нібыта ў яе «шкарпэткі не таго колеру». На наступны дзень Наталлю зноў судзілі паводле ч.1 арт. 24.23 КаАП. Але суддзя адправіў пратакол на дапрацаванне. У выніку міліцыянты напісалі ў пратаколе, што дзяўчына была не толькі ў бел-чырвона-белых шкарпэтках, але і падымала рукі ўгору з пальцамі, складзенымі ў «V».
У выніку суддзя Сяргей Шаціла аштрафаваў Наталлю на 80 базавых велічыняў (2320 рублёў). Адметна, што менавіта гэты суддзя раней судзіў Наталлю за стужачкі.
«Цяпер я павінна 4350 рублёў. Такіх грошай на пагашэнне штрафу ў мяне няма, хоць я працую, але адкладаць запасы магчымасцяў не маю. Спрабавала апратэставаць рашэнне суда па стужках – яго пакінулі ў сіле. Цяпер буду спрабаваць апратэставаць рашэнне па шкарпэтках», – кажа жанчына.
СК belsat.eu
