У Менску 1 красавіка завяршыўся разгляд крымінальнай справы супраць палітзняволеных сясцёр Міронцавых.
Вікторыі Міронцавай прысудзілі 2,5 года зняволення ў калоніі агульнага рэжыму, а ейнай сястры Настассі – 2 гады. Трэцяя сястра пакінула краіну. Пытанні матэрыяльнай кампенсацыі «Менсктрансу» будзе развязваць грамадзянскі суд.
Калі дзеўчын выводзілі з залы суда, яны паказвалі прысутным сімвал перамогі. Маці асуджаных назвала сваіх дачок гераінямі.
«Вы – гераіні», – адзначыла яна.
26-гадовая Вікторыя з адукацыі – мастачка-настаўніца, да затрымання працавала барменкаю. Ейная 24-гадовая сястра Настасся – студэнтка шостага курсу Акадэміі мастацтваў.
Настассю і Вікторыю Міронцавых затрымалі ў сярэдзіне кастрычніка. Беларускія праваабаронцы прызналі іх палітычнымі вязнямі.
Паводле абвінавачвання, Настасся ўвечары 10 жніўня была ў групе грамадзянаў, якія выкрыквалі лозунгі і гучна пляскалі ў далоні, на патрабаванні сілавікоў не рэагавалі. Гэта, паводле следства, прывяло да працяглага парушэння грамадскага спакою, блакавання грамадскага ды іншага транспарту, перашкаджала працы «Менсктрансу», а таксама выкананню службовых абавязкаў сілавікамі. За гэта дзяўчыне выставілі абвінавачванне паводле ч. 1 арт. 342 КК РБ («Актыўны ўдзел у групавых дзеяннях, якія груба парушаюць грамадскі парадак, спалучаных з відавочным непадпарадкаваннем законным патрабаванням прадстаўнікоў улады»).
Таксама яе вінавацяць паводле арт. 364 КК РБ («Гвалт альбо пагроза ўжывання гвалту ў дачыненні працаўніка органаў унутраных справаў») у тым, што яна «не менш за адзін раз схапілася за правую руку (працаўніка Цімафеева) ў вобласці локцевага сустава».
Абвінавачанні Вікторыі выстаўленыя паводле трох крымінальных артыкулаў. Першае – паводле ч. 1 арт. 342 КК. Паводле следства, 14 ліпеня яна з іншымі людзьмі выкрыквала лозунгі, гучна пляскала ў далоні, на просьбу міліцыянтаў не рэагавала. Вікторыя нібыта «аказвала псіхалагічнае і фізічнае ўздзеянне на працаўнікоў АМАПу», была ў счэпцы локцямі.
У гэты ж вечар яна нібыта супраціўлялася работнікам унутраных справаў: упіралася нагамі ў зямлю, а таксама здзяйсняла дзеянні ў тым ліку для вызвалення ад захопу амапаўцамі. У сувязі з гэтым ёй выставілі абвінавачанне паводле ч. 1 арт. 363 КК («Супраціў работніку органаў унутраных справаў або іншай асобе, якая ахоўвае грамадскі парадак»).
Трэці артыкул датычыць падзеяў 10 жніўня. Увечары дзяўчына «на праезнай частцы аўтамабільнай дарогі» праспекту Пераможцаў «узяла актыўны ўдзел у групавых дзеяннях, якія груба парушаюць грамадскі парадак». Пры гэтым яна «аказала фізічнае і псіхалагічнае ўздзеянне на працаўнікоў АМАПу», «публічна выкрыквала правакацыйныя лозунгі». За гэта яе вінавацяць паводле ч. 1 арт. 342 КК.
Акрамя таго, Вікторыя нібыта ўжыла гвалт «у дачыненні Кузняцова, які выявіўся ў тым, што не менш за раз схапіла ягоную правую руку ў вобласці локцевага сустава, парушыўшы цялесную недатыкальнасць, прычыніўшы названаму амапаўцу фізічны боль, а таксама забяспечыўшы неўстаноўленай асобе магчымасць пазбегнуць затрымання».
Дзяўчыны прызналі сваю віну толькі часткова. Пацярпелых на працэсе пяцёра. Усе – міліцыянты, іхныя звесткі змененыя. У судзе яны былі ў масках.
МГ belsat.eu