Калі ў новабудоўлях будуць еўрадвушкі па 1100?

«Вось вы пішаце, што цэны на нерухомасць павінны падаць, а яны не падаюць! Калі ўжо ўпадуць?» – такіх паведамленняў становіцца ўсё больш.

Людзі сочаць за ўпадабанымі новабудоўлямі і здзіўляюцца, дзе еўрадвушкі па 1100? Так, метр у вялікіх трохпакаёвых «па тысячы» знайсці не праблема, а вось цэннік метра ў кампактных кватэрах зашкальвае.

Еўрадвушкі (растлумачым для тых, хто даўно не сочыць за трэндамі) – гэта былыя аднапакаёвыя кватэры плошчай 42-58 квадратных метраў, у якіх інакш запраектаваныя стаякі. І былы пакой пераўтвораны ў кухню-гасцёўню, а экс-кухня – у невялікую асобную спальню. Фармат запатрабаваны ў адзінокіх і пар. І нават у маладых з дзіцём, абмежаваных у сродках, якія ўспрымаюць гэты варыянт як стартавую кватэру.

Уласна, гэты фармат у прынцыпе самы папулярны – дэмаграфічная структура ў краіне такая, што сярод патэнцыйных пакупнікоў ільвіная доля – пералічаныя катэгорыі, абмежаваныя ў сродках. Крыху менш сем’яў з двума дзецьмі – яны (калі гэтак жа абмежаваныя ў сродках) звычайна выбіраюць кампактныя трохпакаёўкі.

Фота: Natalia Fedosenko / TASS / Forum

А калі нешта мае папулярнасць, то чаму не прадаваць даражэй? Разгледзім на прыкладах ЖК Айрона – аднаго з нешматлікіх забудоўшчыкаў, які не хавае цэннік.

ЖК «Менскі квартал». 1-пакаёвыя кватэры 43 м2 тут па 1350 долараў за метр пры разавай аплаце (разам $58050). Еўрадвушкі 43 м2 – 1400 долараў ($60200).

Па 1150 долараў за квадратны метр – еўратрошкі. Але яны 70 м2 – ($80500).

ЖК «Матвееўскі». Кампактная еўрадвушка 47-56 м2 – 1300 долараў (61100-72800). 2-пакаёвыя кватэры ад 63 м2 – 1150 долараў (ад 72450).

Уважлівыя людзі, якія шукаюць новабудоўлі, не могуць не заўважыць – тут кватэра меншай плошчы можа каштаваць даражэй, чым паўнавартасная двушка. Здавалася б, планіроўкі і там і там нядрэнныя.

У чым логіка?

Ды логіка такая ж, згодна якой кватэры на першым паверсе таннейшыя, чым на верхніх. Вышэйшы попыт – вышэйшыя цэны. У Менску попыт сканцэнтраваны на маленькіх кватэрах. І забудоўшчык элегантна выкруціўся, прапанаваўшы не самыя прадаваныя плошчы танней самых прадаваных.

У большасці праектаў, у якіх цэннік плюс/мінус – 1250-1450 за квадрат у «еўрадвушцы», каб кватэра, у залежнасці ад плошчы, змяшчалася ў дыяпазоне 58-72 тысяч. Менавіта гэты дыяпазон запатрабаваны.

Зразумела, што людзей з усёй сумай на руках нешмат. Але пакупніцкую актыўнасць падтрымліваюць партнёрскія крэдытныя праграмы. Яны ёсць практычна ва ўсіх забудоўшчыкаў. Так, каб дакрэдытавацца, трэба мець добрую белую зарплату – і дакрэдытоўваецца большасць на суму, якая не перавышае 20 тысяч долараў.

Пакуль ёсць крэдыты, чакаць ад забудоўшчыкаў зрухаў па цане не варта. Наперадзе ў іх «худыя» гады, і бізнес зробіць усё, каб увайсці ў іх з назапашаным тлушчам.

Спальня ў сучаснай кватэры.
Фота: pixabay.com

А «худы» год можа пачацца раптам – ніхто не ведае, колькі яшчэ пратрымаецца крэдытаванне новабудоўляў. І што яшчэ можа ў краіне адбыцца ў прынцыпе.

Але логіка і тут простая – калі магчымасць дакрэдытавацца знікне, неабходнасць продажаў не знікне – забудоўшчыкі будуць вымушаныя намацваць той цэннік, які асноўная мэтавая аўдыторыя будзе гатовая аплаціць. Хутчэй за ўсё, гэта будзе мінус 8-15 тысяч ад цяперашняга. А значыць, метр ва ўмоўнай еўрадвушцы павінен знізіцца з 1300-1400 да 1150-1250.

Але калі гэта адбудзецца, і ці апошнім будзе гэтае дно – пытанне адкрытае.

І яшчэ варта памятаць, што 1000 – гэта сабекошт метра ў некаторых праектах. Яны здольныя будуць выжываць пры цэнніку ў 1150. Але зніжэнне да сабекошту могуць не перажыць.

Рэдакцыя можа не падзяляць меркавання аўтара.

Стужка навінаў