Дзяржаўны дэпартамент ЗША загадаў вывезці сем’і амерыканскіх дыпламатаў з Беларусі праз магчымую эскалацыю напружання вакол Украіны.
Дзярждэп таксама рэкамендуе сваім грамадзянам не ездзіць у Беларусь.
На мінулым тыдні амерыканскае вонкавапалітычнае ведамства дазволіла ад’езд дзяржаўных службоўцаў ЗША і абавязковы выезд іхных сямейнікаў з амерыканскай амбасады ў Кіеве.
31 студзеня зʼявілася інфармацыя, што амбасаду ЗША ў Менску наагул закрыюць. Крыніцы паведамілі радыё «Свабода», што МЗС Беларусі патрабуе ад амерыканскай дыпламатычнай місіі звольніць працаўнікоў з беларускім грамадзянствам.
Паведамлялі, што дыпмісію пазбавяць магчымасці нармальна працаваць, калі цяпер давядзецца скараціць беларускіх работнікаў, і, верагодна, амбасада будзе вымушаная закрыцца.
У амбасадзе ЗША ў Вільні пацвердзілі гэтую інфармацыю. Там дадалі, што калі нешта зменіцца, то інфармацыю давядуць праз афіцыйныя каналы ўраду ЗША.
Нагадаем, што прызначаную амбасадарку ЗША ў Беларусі Джулі Фішэр у 2021 годзе не пусцілі ў Беларусь, яна працуе з Вільні.
ЗК belsat.eu