Віцебск напярэдадні «Славянскага базару». Штогод абласны цэнтр старанна рыхтуюць да конкурсу, але не яго ўскрайкі. Тут дасюль шмат дзе яшчэ грунтовыя дарогі.
«Тут як машына едзе ўдзень, такі пыл падымаецца, што жах. А куды ўсё? У вокны ідзе і ў хаце асядае», – скардзіцца жыхар вуліцы Рыжская.
Віцябляне неаднаразова звярталіся да мясцовых уладаў з просьбамі дапамагчы. Пяць гадоў таму ім паабяцалі пракласці асфальт. У выніку – засыпалі друзам частку вуліцы Віцебскай. І на гэтым усё.
Развязаць праблему жыхары намагаліся і ўласнымі сіламі – клалі асфальт за асабістыя грошы, але і той ужо зрабіўся непрыдатны.
Псуюць жыхарам жыццё і велізарныя сметніцы, спуштаюцца якія вельмі рэдка. Да таго ж канавы ля дамоў параслі травою, а калектар даўно не працуе. Да праблемы далучыліся грамадскія актывісты і падалі зварот у гарвыканкам, абласны ды гарадскі саветы дэпутатаў. Пад ім падпісаліся прыблізна 150 чалавек.
Пракаментаваць жа тэлеканалу «Белсат» цяпер, чаму развязанне праблемы дасюль не зрушваецца з месца, Віцебскі гарвыканкам не пажадаў. Звонку ж сітуацыя выглядае, быццам на прыватны сектар чыноўнікі папросту махнулі рукою.
Юлія Лабанава, «Белсат», фота: tnd.ru