Амаль сто пытанняў і больш за пяць гадзінаў размовы – чацвёра берасцейскіх актывістаў, якія прэзентавалі пратэстоўцаў супраць акумулятарнага заводу, сустрэліся з міністрам прыроды і аховы навакольнага асяроддзя Андрэем Худыкам.
Распавядае Аляксандр Кабанаў, блогер, «Народны рэпарцёр»:
«Сустрэча была ў пашыраным складзе, то бок апроч нас было 26 асобаў. Было і цяжка, і нейкія маральныя моманты, і на крык пераходзілі. На многія рэчы ўвагі не звярнулі, на многія пытанні мы адказу не атрымалі, што-нішто канешне разабралі».
Акумулятарны завод у свабоднай эканамічнай зоне «Берасце» будуе прадпрыемства «АйПаўэр». На заводзе, размешчаным ля некалькіх вёсак, за два кіламетры ад рысы гораду, плануецца наладзіць поўны цыкл вытворчасці свінцова-кіслотных акумулятарных батарэяў. Праціўнікі заводу лічаць вытворчасць небяспечнай і заяўляюць пра парушэнні на будове.
Пратэсты супраць заводу працягваюцца са студзеня. Мясцовыя ўлады шмат разоў забаранялі акцыі, а актывістаў, блогераў і журналістаў каралі арыштамі і штрафамі. Але за гэты час актывісты сабралі каля 40 тысяч подпісаў супраць шкоднай вытворчасці, сустракаліся з кіраўніцтвам гораду і прадстаўнікамі фірмы-забудоўніка, разаслалі некалькі соцень зваротаў у розныя інстанцыі.
Блогер Аляксандр Кабанаў працягвае:
«Пратэстуюць акурат супраць фактаў, адкрытых у працы прадпрыемстваў у гарадах нашай краіны, у Пінску, Белазёрску. Знойдзеныя факты дзяржаўнага маніторынгу забруджвання глебы. І пад ціскам гэтых фактаў і арганізаваная сустрэча».
Са словаў Аляксандра Кабанава, міністр падчас сустрэчы неаднаразова падзякаваў актывістам за тое, што яны робяць працу эколагаў, але папракнуў, што шмат інфармацыі ў іхных запытах – неаб‘ектыўная. А паводле актывіста, чыноўнікі карыстаюцца дакументацыяй і інструкцыямі яшчэ савецкага часу.
Але не ўсе пратэстоўцы лічаць шлях перамоваў з уладамі правільным.
«Худык недзеяздольная асоба, ён не прымае рашэнняў. Яму далі каманду выклікаць людзей, яны ведаюць, што Дзям’ян Лепясевіч і Дзмітрый Бекалюк штосьці накапаюць. І яны накапалі, яны прафесійныя хлопцы. А цяпер чыноўнікі будуць задаваць пытанні і дазнаюцца, што яны яшчэ ведаюць. А потым скарэктуюць так, што потым ніякім судом нічога даказаць нельга», – тлумачыць Фёдар Петрусевіч, грамадскі актывіст.
Пасля таго, як у сярэдзіне снежня стануць вядомыя вынікі другой дзяржаўнай экалагічнай экспертызы праекту, міністр абяцаў зноў сустрэцца з пратэстоўцамі. На заводзе тым часам мантуюць абсталяванне, і ўжо ў студзені плануецца пробны запуск.
Ірына Дарафейчук, belsat.eu