Аб'ектыў 24.02.2019 Замест дзяржаўнага ТВ беларусы глядзяць блогераў


Гледачы цэняць нас за шчырасць, кажуць аўтары відэаблогаў.

Незалежнае тэлебачанне ды інфармацыйная бяспека. Гэта перадусім трэба нашай краіне, паводле Беларускай асацыяцыі журналістаў. Блогеры і медыяэксперты, журналісты і рэдактары сабраліся разам у Гомлі, каб абмеркаваць стан медыяў у нашай краіне ды прапанаваць свае ідэі для развязання існых праблемаў.

«Гіпнажаба ў замбаскрыні» як сімвал дзяржаўнай прапаганды, што авалодвае розумамі тых, хто не мае доступу да незалежнай інфармацыі. Як адарваць ад яе позірк? Пэўным адказам стала назва імправізаванага ток-шоу, якое прайшло ў Гомлі – «Патрэба ў незалежным ТБ ды інфармацыйнай бяспецы».

«Тыя, што цікавяцца фактамі, што маюць імкненне расказваць незалежную інфармацыю або даюць дакладна палітычны кантэнт, у тых ёсць пэўныя праблемы. І тут можна казаць, што тэлеканал «Белсат» лідаруе сярод тых, каго штрафуюць», – заўважыў падчас сустрэчы медыяэксперт Паўлюк Быкоўскі.

Патрэбе ў незалежным тэлебачанні абавязкова будуць спадарожнічаць праблемы. І гэта не толькі ціск з боку ўладаў, але і пэўная адсутнасць попыту.

«Людзі не вельмі цікавяцца сёння палітычнымі навінамі, а незалежнае тэлебачанне – гэта найперш пра палітычныя і сацыяльныя праблемы. А з другога боку – няма і вялікага патрабавання для існавання якасных СМІ, якія б людзі хацелі ўтрымліваць у тым ліку за свой кошт», – дадае Быкоўскі.

Ствараць жа попыт на інфармацыю дапамагаюць блогеры. Можа, не ўсе з іх пакуль дыктуюць інфармацыйны парадак дня, але вострасацыяльныя тэмы, якія яны ўздымаюць, бясспрэчна хвалююць грамадства. Не проста быць папулярным, але і дапамагаць людзям. Усё часцей блогеры ствараюць не толькі забаўляльны, але і інфармацыйны кантэнт, паведамляюць аб праблемах ды заклікаюць да супольнага іх вырашэння.

Людзі, у сваю чаргу, заўжды гатовыя дапамагчы блогеру – прычым як патрэбнай інфармацыяй, гэтак і рублём. А таму блогінг ды палітычны актывізм становіцца ўсё цяжэй адрозніць у сённяшнім грамадстве. Андрэй Павук, да прыкладу, і актывіст, і відэаблогер, і прадзюсар, і нават музыка.

«Мы не павінныя нікому даваць справаздачу за тое, што мы зрабілі. Не апраўдваемся ні перад кім, няма начальнікаў і кіраўнікоў. Блогінг – гэта свабода, палёт, таму я б хацеў, каб больш людзей падключалася да такога цікавага занятку, як блогерства», – кажа Павук, аўтар блогу «Рудабельская паказуха».

Рабіце тое, што вам падабаецца, ды не паддавайцеся спробам дзяржавы зрабіць вас аднолькавымі, раіць Андрэй Павук. Людзі шчырасць цэняць: паводле ўдзельнікаў імпрэзы, у беларусаў значна вырас інтарэс да крыніцаў інфармацыі ў сеціве. А вось традыцыйнае тэлебачанне пераважна старэе – як і ягоныя гледачы.

Сцяпан Святлоў «Белсат»

Глядзі таксама
Каментары