Без амбітных мэтаў і адказаў на галоўныя выклікі, якія стаяць перад Беларуссю: сёлетні выступ Аляксандра Лукашэнкі выразна кантраставаў са святочнымі віншаваннямі мінулых гадоў. Чым хваліўся і да чаго заклікаў грамадзянаў у Новы год кіраўнік Беларусі, а таксама ягоныя калегі з постсавецкае прасторы?
У навагоднім звароце Лукашэнка павучаў моладзь не шукаць шчасця за мяжою, школьнікаў заклікаў запрасіць бабуль і дзядуляў на «культурніцкія ды спартовыя імпрэзы», а асноўнымі дасягненнямі года назваў захаванне міру і добраўпарадкаванне вёсак.
«Мы аб‘ядналіся ў імкненні зрабіць кожны куток Беларусі не проста прыгожым, а ўзорным. І ў годзе, што надыходзіць, нам належыць зрабіць усё, каб краіна патанала ў зеляніне і кветках», – гаварыў кіраўнік Беларусі Аляксандр Лукашэнка.
Не прагучала мэтаў на будучыню, не хваліўся Лукашэнка ані дыпламатычнымі, ані эканамічнымі поспехамі. А шмат хто з беларусаў хацеў пачуць у прамове адказы на эканамічныя выклікі.
«Для паляпшэння Беларусі, каб жыць лепш было».
«Пабольш удзяляць часу росквіту гораду».
«Будзем бачыць, што ў гэтым годзе будзе з Пуціным, эканомікай і гэтак далей», – кажуць жыхары Менску.
А вось пра гэта – праблему страты расейскіх нафтавых субсідыяў і заклікі Крамля распачаць «усёабдымную» інтэграцыю – Лукашэнка не сказаў ні слова.
«З тых жа перамоваў у Крамлі, на якія ён два разы з’ездзіў, ён вярнуўся з пустымі рукамі. Яму няма што сказаць, няма адказу на пытанні, якія пастаўленыя перад Беларуссю», – тлумачыць Юрась Губарэвіч, рух «За свабоду».
Не было чым парадаваць сваіх грамадзянаў і ўладару Крамля. Уладзімір Пуцін толькі заклікаў аб’яднацца перад абліччам праблемаў:
«Памочнікаў у нас ніколі не было і не будзе. І таму нам важна быць згуртаванай, адзінаю, моцнаю камандаю».
Гледачоў жа ўкраінскага каналу «1+1», які належыць алігарху Ігару Каламойскаму, з Новым годам павіншаваў зусім не ўкраінскі прэзідэнт.
«Я іду ў прэзідэнты Украіны».
Пра гэта апоўначы заявіў вядомы комік Уладзімір Зяленскі, звязаны, як падкрэслівае шэраг мясцовых СМІ, з тым жа Каламойскім. Выбары ва Украіне адбудуцца ўжо ў сакавіку, таму натуральна, што дзейны прэзідэнт Пятро Парашэнка шмат абяцаў:
«Наперадзе – паступовы рост эканомікі і аднаўлення ўзроўню жыцця. Гэта вынік нашай агульнай карпатлівай працы. Галоўнае – у перадвыбарнай гонцы не затаптаць парасткаў развіцця, прарошчаных цаною вялікіх ахвяраў і каласальных намаганняў кожнага з вас».
Украінцы навагоднія заклікі і абяцанні палітыкаў успрымаюць скептычна.
«Як па мне, гэта ўсё фармальнасці – гэтыя віншаванні».
«Гэта ўсё адно што паглядзець нейкі фільм. Гэта штучна».
«Усё бачна па дзеяннях, якія адбываюцца, па справах. Словы – гэта дробязі», – лічаць жыхары Харкава.
Аднак кіраўнікі постсавецкіх краінаў тэкстам сваіх віншаванняў аддаюць шмат увагі.
«Да чаго ж жыццё цудоўнае, краіна – як прамяністы рай!» – Гурбангулы Бердымухамедаў распавёў грамадзянам пра шчаслівае жыццё ў Туркменістане ўласным вершам.
А вось кіраўнік армянскага ўраду Нікол Пашыньян дабрабытам не хваліўся, затое заклікаў зрабіць 2019-ты годам «эканамічнай рэвалюцыі». Абяцаў прывесці да эканамічнага прарыву і 78-мігадовы кіраўнік Казахстану Нурсултан Назарбаеў:
«Год, што надыходзіць, абвешчаны Годам моладзі. Упэўнены, маладое пакаленне апраўдае наш давер і здолее вывесці Казахстан у лік 30-ці найлепшых дзяржаваў планеты».
Шмат хто паспеў назваць гэтыя словы пацвярджэннем чутак пра сыход бяззменнага лідара Казахстану – Назарбаеў кіруе краінаю з дзевяностага года. Праўда, той абяцаў сысці з пасады яшчэ дзевяць гадоў таму, так што з такімі палітычнымі аксакаламі не варта рабіць хуткіх высноваў.
Аляксандр Папко, belsat.eu
