Сапраўдная перадвыбарчая кампанія, якую беларусам не пакажуць па дзяржаўным тэлебачанні. Аб’яднаная грамадзянская партыя вылучыла 8 асобаў, якія будуць прэтэндаваць на дэпутацтва ў мясцовыя саветы па Магілёўскай вобласці.
Распачаўся і збор подпісаў
«Канешне, мы разумеем, што галасы ў нас не лічаць, што пратаколы аформленыя ўжо загадзя, але мы будзем дабівацца сваіх мэтаў. Мы будзем распавядаць людзям усю праўду пра нашае жыццё. Мы будзем працаваць з людзьмі», – упэўнены Уладзімір Шанцаў, старшыня АГП у Магілёве.
Суіскальніца па Грушаўскай выбарчай акрузе № 36 – інжынерка і прадпрымальніца Таццяна Сівачэнка, саўладальніца канструктарскага бюро, якое намагаецца прасоўваць энергаашчадныя тэхналогіі на айчынных прадпрыемствах.
Прэтэндэнтка абяцае заняцца блізкімі магілёўцам праблемамі. А таксама бракам камунікацыі ўладаў на ўсіх узроўнях з грамадзянамі, беспрацоўем, нізкімі заробкамі ды пенсіямі.
Кандыдат ад іншай партыі ды іншы горад, але мэта – тая ж
Галоўнае – звярнуць увагу выбарнікаў на альтэрнатыўнага кандыдата.
У Горадні ў мікрараёне Альшанка падчас пікету збіралі подпісы за старшыню абласной філіі беларускіх хрысціянскіх дэмакратаў Яўгена Дудкіна.
«Я думаю, шанцы ёсць. Самае галоўнае, што ёсць падтрыманне людзей. Чаму? Па-першае, ёсць праблемы, якімі я заняўся, і людзі падтрымалі, ёсць вынік. Людзі бачаць, што дэпутаты, прызначаныя ўладамі, не спраўляюцца, нават не звяртаюць увагі на іх», – даводзіць 28-гадовы гісторык Яўген.
Як рэагуюць звычайныя беларусы на кампанію, якую разгарнулі апазіцыйныя кандыдаты – глядзіце ў відэаматэрыяле «Аб’ектыву»
Тэрмін вылучэння кандыдатаў – да 8-га студзеня ўлучна. Пасля распачнецца перыяд агітацыі. Выбары дэпутатаў мясцовых саветаў Беларусі маюць адбыцца 18-га лютага 2018-га года.
Лола Бурыева, «Белсат», фота: Vasily Fedosenko / Reuters / Forum
