Штраф паўтысячы рублёў ці больш за тысячу пры паўторным затрыманні. Такое пакаранне чакае за кіраванне аўтамабілем без правоў. Жыхар вёскі Насовічы на Гомельшчыне заплаціў за гэта жыццём. Чаму так здарылася? У вяскоўцаў і ў даішнікаў – розныя версіі. Ірына Дарафейчук.
«Дарогі не было бачна праз пыл».
Так відавочцы апісваюць пераслед даішнікамі кіроўцы без правоў. Пераслед, які скончыўся смерцю.
«Паглядзіце, якія яміны – гэта ў паветры ўдар быў, што машына ўвайшла ў зямлю».
Трагедыя адбылася 4 красавіка ў вёсцы Насовічы Добрушскага раёну. Паводле аднавяскоўцаў, Віталь Дагліс уцякаў ад машыны дарожна-патрульнай службы па вясковай вуліцы ды на высокай хуткасці ўрэзаўся ў слуп.
«Людзі казалі, што стрэлка застыла на 130 кіламетрах».
25-гадовы Віталь Дагліс выехаў сваім нядаўна набытым аўтамабілем у краму. Са словаў маці, пасведчання кіроўцы ён не меў, хоць аўташколу ўжо скончыў.
«Яму сказалі, што з Лагуноў едуць ДПСнікі, ён стартануў па Палявой. А яны, ДПСнікі, заўважылі і за ім пагналіся ды пачалі падразаць яго», – кажа жыхар вуліцы Палявая Вадзім.
Паводле версіі ДАІ, кіроўца загінуў сам, няправільна выбраўшы хуткасць і не справіўшыся з кіраваннем. Даішнікі ж, нібыта, прыехалі на месца здарэння толькі праз 10 хвілінаў. Вяскоўцы ў адзін голас цвердзяць, што была менавіта пагоня.
«Гэта цягам трох-пяці секундаў адбывалася: першая машына – гул ішоў неверагодны, і другая следам. А тое, што хтосьці кажа, што яны праз 10 хвілін пад’ехалі – не. Гэта ўсё мы бачылі», – гаворыць Віталь Васілеўскі, жыхар вёскі Насовічы.
Тое, што даішнікі зладзілі пагоню ў паселішчы, на вуліцы, дзе маглі гуляць дзеці, абурыла вяскоўцаў.
«Ёсць куча сведкаў, людзі выходзілі з сякерамі, ішлі проста на гэтых даішнікаў. Працаўнікі міліцыі за краты, дзе возяць арыштантаў, схавалі гэтых даішнікаў, каб людзі не ўтварылі самасуду», – гаворыць маці загінулага Наталля Халшчанкова.
Праваабаронца Леанід Судаленка тлумачыць, што для пераследу парушальніка патрульнай машынай існуе адмысловы рэгламент. Маюць быць улучаныя маячкі чырвонага і сіняга колеру ды праз мегафон даішнікі маюць загадваць кіроўцу спыніцца. Праваабаронца Леанід Судаленка:
«Калі гэтая працэдура не вытрыманая, то гэта парушэнне з боку міліцыі, і сваякі загінулага кіроўцы па выніках службовага расследавання маюць права паставіць пытанне ў тым ліку і пра спагнанне маральнай шкоды».
Паводле мясцовых жыхароў, гэта быў не адзіны выпадак пераследу ў вёсцы.
«У той самы дзень гэтыя ж даішнікі ганяліся за хлопцам, які ехаў на мапедзе, але своечасова мужчына гэтых даішнікаў затрымаў. Хлопца гналі, які ехаў на мапедзе без шалома», – распавядае маці загінулага.
Сваякі загінулага маюць намер дамагацца пакарання для працаўнікоў ДАІ, на іхную думку, вінаватых у смерці маладзёна.
– Дабівацца чаго?
– Праўды. Справядлівасці. Пакарання даішнікаў.
Ірына Дарафейчук, belsat.eu