Каталунню ахапіў усеагульны страйк, які мусіць падмацаваць вынікі рэферэндуму аб незалежнасці іспанскай аўтаномнай правінцыі. Сёння не працуе большасць крамаў, дзяржаўных установаў, метро і чыгунка ўвялі працяглыя перапынкі.
Перад барсэлонскім прадстаўніцтвам у кіроўнай іспанскай Народнай партыі сабраліся некалькі сотняў чалавек. А на ўніверсітэцкай плошчы сталіцы рэгіёну на дэманстрацыю прыйшлі некалькі тысяч удзельнікаў. Да забастоўкі далучыліся каталонскія футбольныя клубы і палітыкі.
Пазіцыя Бруселю на нядзельны рэферэндум аказалася на баку Мадрыду – Еўракамісія напярэдадні прызнала плебісцыт незаконным. Сёння падобным чынам пра падзеі ў Каталунні выказаўся і афіцыйны Менск.
«У дачыненні спрэчкі паміж урадам Іспаніі і ўрадам аўтаномнай правінцыі Каталонія МЗС зыходзіць з таго, што гэтая спрэчка зʼяўляецца выключна ўнутрыіспанскаю справай і павінна вырашацца мірным шляхам у межах заканадаўства Іспаніі», – зазначыў прэс-сакратар МЗС Беларусі Дзмітрый Мірончык.
Ужо заўтра ўрад рэгіёну мусіць абвесціць незалежнасць Каталунні ад Мадрыду, які зрабіў стаўку на сілавы метад ды спрабаваў перашкодзіць галасаванню пры дапамозе спецназу і паліцыі – у выніку нядзельных сутыкненняў пацярпелі больш за 800 асобаў.
Віталь Бабін, «Белсат», фота: Ivan Batyrev / TASS / Forum