Прынамсі пяцёра загінулых, двое зніклых без звестак, 130 асобаў шпіталізавалі, і тысячы эвакуяваныя. Больш за паўсотні населеных пунктаў Іркуцкай вобласці з 24 чэрвеня сыходзяць пад ваду. Нягледзячы на масу фотаздымкаў і заклікаў аб дапамозе, федэральныя ўлады адрэагавалі на патоп толькі 28 чэрвеня. Уладзімір Пуцін прыляцеў у Іркуцкую вобласць у нядзелю.
Раніцай у панядзелак Міністэрства па надзвычайных сітуацыях па Іркуцкай вобласці апублікавала на сваёй старонцы невялікую зацемку аб нязначным уздыме ўзроўню вады ў сувязі з праліўнымі дажджамі. У паведамленні гаварылася аб маніторынгу за сітуацыяй і тым, што бяспецы жыхароў нічога не пагражае.
І хаця ўзровень вады ў некалькіх рэках Іркуцкай вобласці падняўся ў некаторых месцах на тры метры за крытычныя адзнакі ўжо ў ноч на 26 чэрвеня, кіраўнік МНС Яўгеній Зінічаў вылецеў у Іркуцкую вобласць толькі ў пятніцу – пасля таго, як ад стыхіі загінулі два чалавекі, падае «МБХ медиа».
Уладзімір Пуцін прыляцеў сюды толькі ў нядзелю – на зваротным шляху з саміту Вялікай дваццаткі ў Японіі.
«Мы з вамі добра ведаем сітуацыю ў сібірскіх рэгіёнах. У тым ліку тут. Лета вельмі кароткае, зіма наступае хутка, а павадак яшчэ не скончыўся. Вада не сышла. Калі будаваць будзем? Часу вельмі мала. Трэба зрабіць усё, каб людзі не апынуліся ў намётах, калі надыдуць халады. І агулам прадугледзець усе магчымыя варыянты здарэнняў», – загадаў Пуцін.
У рэгіёне існуе рызыка інфекцыі – пад павадак трапілі водазаборы, якія забяспечвалі людзей вадою. МНС Расеі сфармавала групоўку з тысячы чалавек. Але гэтага мала – абвесцілі набор добраахвотнікаў.
У Іркуцкай вобласці працуюць 20 пунктаў часовага размяшчэння. У іх цяпер больш за паўтары тысячы чалавек.
Ян Вярбіцкі/ДД, «Белсат»