Доўгія гады ва Украіне самым папулярным палітыкам быў Аляксандр Лукашэнка. Кіраўніка Беларусі падтрымлівалі дзве траціны ўкраінцаў. Аднак падзеі апошніх месяцаў змянілі да яго стаўленне. Падрабязней – у матэрыяле маіх калегаў.
Людміла заўсёды з захапленнем глядзела ў бок Беларусі. Там Бацька, парадак і якасныя прадукты.
«У людзей пастаянна праца, пастаянны заробак. Працуюць усе прадпрыемствы. У тым ліку гэты ваш знакаміты БелАЗ. Пенсіі выплачваюць. Усе гарады вельмі чыстыя, ніводнай ніколі ні паперкі не знойдзеш, ні запалачкі. У крамах поўна прадуктаў, людзі не галадаюць, кошты нармальныя», – гаворыць жыхарка Кіева Людміла.
І такіх, як Людміла, ва Украіне шмат. Тут Аляксандр Лукашэнка доўгія гады заставаўся самым папулярным замежным палітыкам. Аднак апошнія падзеі змянілі ўсталяваную тэндэнцыю. Калі яшчэ летась у лістападзе кіраўніка Беларусі падтрымлівалі 66 % украінцаў, то сёння, ужо ў статусе самаабвешчанага, – толькі трыццаць.
«Лукашэнка – «А» – гэта моцная рука. «Б» – створаны вобраз персоны. То бок гэта ўсё беларускае марожанае, якасць, парадак, дарогі – вось гэта ўсё эфемернае, нам рэтранслявалася і стварыла ў галовах людзей ацэнку. Зараз дадаўся трэці крытэрый – гэта дзікае поле, якое альтэрнатыўна супраць яго: адносна стыхійны пратэст, які доўгі час не здаецца. І вось лічбы памяняліся», – тлумачыць палітычны эксперт Багдан Бандарэнка.
Таксама сацыёлагі ўсталявалі сувязь паміж сімпатыяй да постаці Лукашэнкі ды палітычнымі перавагамі ўнутры Украіны. Аказалася, электарат мясцовай прарасейскай партыі пераважна падтрымлівае дыктатара.
«Сваю інфармацыю яны атрымлівалі са стандартных наратываў: што хтосьці рыхтуе каляровую рэвалюцыю ў Беларусі. Ну, а калі каляровая рэвалюцыя – яны заўсёды ж, канечне, за стабільны дзяржаўны лад», – кажа Багдан Бандарэнка.
Сярод выбарнікаў Зяленскага – тых, хто вагаецца, больш. Толькі 28 % – на баку Лукашэнкі. Да падзеяў гэтага лета Людміла заўсёды была на баку самазванага прэзідэнта. Але цяпер сваё стаўленне да яго змяніла.
«Калі народ ідзе на такія ахвяры, што яго збіваюць, і бʼюць, і катуюць, і кідаюць у турмы, значыць, не ўсё было добра, як нам збоку здавалася», – мяркуе Людміла.
А вось электарат Парашэнкі – пятага прэзідэнта Украіны – зусім не падтрымлівае дзеянняў Лукашэнкі. Толькі 4 % выступаюць на ягоным баку. Жыхар Кіева Валянцін сваю пазіцыю тлумачыць так:
«Здзіўляе гэтая тупая ўлада ў асобе Лукашэнкі, якая трымаецца за сваё крэсла насуперак жаданню людзей, насельніцтва Беларусі. І, вядома ж, натхняе і выклікае павагу мужнасць людзей, якія ходзяць на гэтыя пратэсты, нягледзячы на прэсінг, які супраць іх выкарыстоўваецца».
Падзяліліся меркаванні і геаграфічна. За пратэстоўцаў выступае захад і цэнтр Украіны. Поўдзень і ўсход – падтрымліваюць Лукашэнку.
Алег Рашатняк, Анастасія Русецкая, «Белсат»
