Пяціпавярховік на вуліцы Першамайскай № 72 у Верхнядзвінску праваліўся ў сацыяльнае дно, а разам з домам – і ўсе ягоныя жыхары. У кватэры вада трапляе літаральна з усіх шчылінаў. Як вынік – цвіль і холад.
На пачатку 90-ых гэты дом пабудавалі ўсяго за тры месяцы. Тады ніхто не зважаў на недаробкі, усе хацелі як найхутчэй засяліцца. Апроч жыхароў Верхнядзвінску, кватэры тут былі атрыманыя перасяленцамі з чарнобыльскіх раёнаў. Рамантавалі і, як кажуць, даводзілі да ладу ўсё за ўласныя сродкі.
«Я яшчэ не паспеў выплаціць крэдыт, які браў на рамонт на 10 гадоў і бачыце што атрымалася. Шок», – кажа жыхар дому Аляксей Ломач.
Аднойчы жыхары дому Новы год сустракалі без святла, газу і цяпла. Зрэшты, цяпер сітуацыя не нашмат лепей. Больш за тое, улады перакладаюць адказнасць на самых жыхароў.
«Адгаворкі такія, што вінаватыя ў тым, што не пагадзіліся на адсяленне, тады гэтых бы праблемаў не было. Хаця я вам ужо казаў, тут палка ў двух канцах, былі б мы тут ці не – усё было б тое самае», – даводзіць спадар Ломач.
«Цячэ наўпрост па жырандолі, самае асноўнае трапляе ў бочку, рэшта ў міскі. З жонкаю за ноч 6-7 бочак выліваем, за ноч. Як на працу сыходзім, суседка дапамагае, а што зробіш?», – дзеліцца сусед Аляксея Ломача.
У аплаце камунальных паслугаў зніжак тут ніякіх няма, і гэта не зважаючы на тое, што цяпер тэмпература ў кватэрах не падымаецца вышэй за 11 градусаў. Спаць даводзіцца не толькі пад коўдрамі, але і пад плёнкаю.
Будаўнікі абяцаюць, што скончаць рамантаваць дом да 21-га снежня. Пра кампенсацыю стратаў гаворкі не ідзе.
Жыхары аварыйнага дому далікатна зазначаюць, што ніхто ў мясцовым выканкаме з імі не сябруе. Некаторым наўпрост гавораць: вас ніхто не прымушае тут жыць.
«Людзі забіраюць лісты, пачаліся звальненні. Цягам 10 гадоў мы пішам – дах цячэ – нам адказ – рамонт будзе зроблены», – кажа яшчэ адная небарака Марына Каляда.
Увагу на праблемы нешчаслівага пяціпавярховіка звярнулі толькі пасля таго, як у жніўні перад домам даслоўна правалілася зямля. Здымкі трапілі ў інтэрнэт, і толькі тады жыхарам паабяцалі распачаць рамонт. Але актыўную яго фазу пачалі толькі ўвосень.
Абсурднасці сітуацыі дадае той факт, што менавіта ў гэтым жа доме жыве намесніца старшыні Верхнядзвінскага райвыканкаму ў сацыяльных пытаннях. Толькі пасля ўвагі да дому з боку медыяў яна паведаміла жыхарам, што іхнае пытанне – на кантролі ў райвыканкаме.
Аркадзь Несцярэнка, «Белсат»