Сяброўскае паседжанне было прымеркаванае да юбілею асноўнага закону краіны.
Канстытуцыі Беларусі амаль 25 гадоў. Яе стваралі і прымалі даволі цяжка, з супрацівам, але менавіта Канстытуцыя 1994-га года замацавала наш суверэнітэт, кажа Валянцін Голубеў, удзельнік працоўнай групы па напісанні асноўнага закону.
«Калі мы зрабілі Канстытуцыю незалежнай Рэспублікі Беларусь, для мяне стала зразумелым, што дзяржава адбылася, яна будзе жыць, і за яе можна змагацца», – дадаў Голубеў.
Дакумент атрымаўся ў цэлым збалансаваны, кажа Лявон Баршчэўскі. Але не ідэальным.
«Былі хібы ў фармулёўцы раздзялення ўладаў: прэзідэнцкія паўнамоцтвы, парламента, судовых органаў і гэтак далей. Гэта былі правільныя фразы, але яны дазвалялі розначытанні. Гэта было потым выкарыстана, каб змяніць Канстытуцыю, і яе не да канца выконваць», – кажа дэпутат Вярхоўнага Савету 12 склікання Лявон Баршчэўскі.
Удзельнікі сённяшняй сустрэчы ў Менскім міжнародным адукацыйным цэнтры – дэпутаты Вярхоўнага Савету 12-га і 13-га склікання, сапраўдныя народныя абраннікі 1990-х гадоў.
«Сабраліся дэпутаты не толькі каб адсвяткаваць гэтую нагоду, а таксама каб абмеркаваць, што трэба рабіць, і аб’яднаць намаганні, каб абараняць нашую незалежнасць», – кажа дэпутат Вярхоўнага Савету 13-га склікання Аляксандр Дабравольскі.
Былі на сённяшняй сустрэчы і ўдзельнікі галадоўкі ў парламенце, акцыі пратэсту супраць рэферэндуму аб змене Канстытуцыі, ініцыяванага Лукашэнкам. Тады, у красавіку 1995-га, Лукашэнка ўжыў спецназ для збіцця і разгону дэпутатаў. У выніку пасля змены Канстытуцыі Беларусь адмовілася ад нацыянальных сімвалаў: бел-чырвона-белага сцяга і герба «Пагоня»; расейская мова стала дамінаваць у дзяржаўных дакументах, і рэспубліка, якая магла стаць краінай Еўразвязу, стала аўтарытарнай дзяржавай, саюзнай Расеі.
Другі старшыня Вярхоўнага Савету Мечыслаў Грыб зазначае, што ў медыях «ідзе абмеркаванне пытання Саюзнай дзяржавы Беларусі і Расеі, пра ўваходжанне Беларусі ў Расею цалкам ці асобнымі вобласцямі».
А таму – нагоды клапаціцца пра незалежнасць зноўку ёсць.
Яраслаў Сцешык, «Белсат»