Аб'ектыў 06.06.2018 У Менску «мадэрнізуюць» могілкі – пілуюць дрэвы і крыжы


Пачулі працу бензапілы ды пабачылі высяканне дрэваў. Аказалася, высяканне – гэта не адзінае, што адбываецца цяпер на сталічных Вайсковых могілках. Камунальнікі руйнуюць магільныя агароджы і разбіваюць старыя надмагіллі.

Замест іх усталююць падгалоўнікі адзінага ўзору. З Вайсковых могілак плануецца зрабіць гістарычна-мемарыяльны комплекс. Але ня ўсім менчукам даспадобы гэтая ідэя.

«Мадэрнізацыяй» і «добраўпарадкаваннем» вайсковых могілак называюць працаўнікі сталічнага «Зялёнбуду» высяканне дрэваў. Паводле ж жыхароў сталіцы, іхнага меркавання наконт гэткай «мадэрнізацыі» ніхто не запытваўся.

Намеснік дырэктара спецкамбінату КБА паведаміў, што дрэвы пілуюцца, бо яны «гнілыя». Пры гэтым ніякіх дакументаў, якія пацвярджаюць ягоныя словы, а таксама дазвол на высяканне, ён не паказаў.

«У планах спілаваць не ўсе дрэвы, а толькі аварыйна небяспечныя і сухастойныя. І гэта работа выконваецца», – кажа намеснік дырэктара спецкамбінату КБА Сяргей Тур.

Некаторыя мясцовыя жыхары абураныя знішчэннем фактычна паркавай зоны і звяртаюць увагу на шматлікія парушэнні пры правядзенні працаў для добраўпарадкавання могілак.

«Я патэлефанаваў у міліцыю, прыехаў адзін супрацоўнік. Яны трохі паразмаўлялі. Ён таксама супрацоўніку не паказаў ніякіх дакументаў. Хоць у яго павінныя былі быць фотаздымкі дрэваў, якія ён зразае. Я паехаў у Савецкі РУУС, каб напісаць заяву», – распавядае мясцовы жыхар Аляксандр Гікала.

Дрэвы – не адзінае, што на Вайсковых могілках закранула гэтак званая мадэрнізацыя. Камунальнікі дэмантавалі шэраг крыжоў помнікаў ды агароджаў. Паводле сваякоў людзей, пахаваных на могілках, іх пра гэткія захады ніхто не папярэдзіў.

Глядзі таксама
Каментары