Раварыстам няма месца нідзе. У Беларусі агулам забаронена рухацца на ровары па дарозе, калі побач ёсць ходнік. А ў Магілёве цяпер нельга ехаць і па ходніку ў цэнтры гораду. Дык што ж рабіць?
Мясцовыя раварысты патрабуюць адмяніць забароны.
Больш забароненага ў Магілёве: пешаходнаю вуліцай Ленінскай цяпер нельга перасоўвацца на ровары. Тут з’явіліся забараняльныя дарожныя знакі.
Ідэю пасунуць раварыстаў з гістарычнага цэнтру Магілёва ўхваліла гарадская камісія ў пытаннях бяспекі дарожнага руху. Галоўнаю падставаю для забароны стала непаразуменне паміж пешаходамі ды раварыстамі.
«Вось літаральна цяпер перада мной праехаў вось гэты, ён мяне ледзь не збіў», – кажа жыхарка гораду.
Іншая абураецца:
«Іншы раз ідзеш – страх, вось разумееце. Дзеці малыя ідуць, гэта ўвогуле невыносна!»
ДАІ Магілёва на гэты момант не падае зводкі дарожна-транспартавых здарэнняў, якія адбыліся на Ленінскай з удзелам раварыстаў. Затое ігнаруе пункт Правілаў дарожнага руху 2.48, які кажа, што ў пешаходнай зоне ажыццяўляецца рух як пешаходаў, гэтак і раварыстаў.
Раварысты ж выступаюць супраць забароны.
«Не было ніводнага наезду на пешахода. Ну як сказаць: раварыст заўжды аб’едзе пешахода», – кажа адзін з аматараў двухколавага транспарту.
Іншы тлумачыць, чаму не трэба было ўводзіць забарону:
«Ленінская – адзіная вуліца для бяспечнага руху раварыстаў і пераходаў, ну як бы самая спакойная вуліца».
Нехта і ўвогуле не верыць, што забарона нешта зменіць.
На сайце «Зручны горад» ужо з’явілася петыцыя за тое, каб аднавілі дазвол перасоўвацца на ровары па Ленінскай. Сабраныя подпісы пойдуць у аблвыканкам. У якасці развязання праблемы аўтар петыцыі прапаноўвае павышаць культуру перасоўвання на ровары, а таксама спрыяць развіццю велаінфраструктуры ў горадзе.
«Я настойліва рэкамендаваў бы ў бліжэйшы час прыняць канцэпцыю развіцця роварнага руху. Канцэпцыя, прынятая нашай арганізацыяй, дазваляе пашырыць магчымасці раварыстаў, і, што немалаважна, не ў шкоду пешаходам», – кажа Мікіта Раманоўскі з «Цэнтру гарадскіх ініцыятываў».
Раней раварыстаў у Беларусі штрафавалі за рух па праезджай частцы, цяпер пачнуць штрафаваць і за рух па ходніках. У адпаведнасці з артыкулам 18.23 КоАП парушэнне Правілаў дарожнага руху раварыстам караецца папярэджаннем ці штрафам ад адной да трох базавых велічыняў.
Аліна Скрабунова, belsat.eu